ត្រី​ដូ​ហ្វ៊ី​ន ឬ​ផ្សោត​សមុទ្រ​ បាន​កើនឡើង​បន្ទាប់ពី​មានការ​អភិរក្ស​

0
864

ខេត្តកែប​៖ បន្ទាប់ពី​ដំណើរការ​អភិរក្ស​អស់​រយៈពេល​ជិត​១០​ឆ្នាំ ត្រី​ដូ​ហ្វ៊ី​ន ឬ​ផ្សោត​សមុទ្រ​ក្នុង​ដែនទឹក នៃ​ខេត្ត​កែប​បាន​កើន​បរិមាណ​ជា​បន្តបន្ទាប់​។ វត្តមាន​សត្វ​កម្រ​នេះ តែង​បង្ហាញខ្លួន​នៅ​ចំណុច​កោះ​មួយចំនួន​ពេល​អាកាសធាតុ​មាន​លក្ខណៈ​ស្ងប់ស្ងាត់​។​

​លោក គុជ វីរៈ នាយ​ខណ្ឌ​រដ្ឋបាល​ជល​ផល នៃ​មន្ទីរ​កសិកម្ម រុក្ខាប្រមាញ់ និង​នេសាទ​ខេត្ត​កែប បាន​រៀបរាប់ថា រៀងរាល់​អាកាសធាតុ​ស្ងប់ស្ងាត់ មិន​ថា​រដូវប្រាំង ឬ​វស្សា​ទេ ផ្សោត​សមុទ្រ​តែង​បង្ហាញខ្លួន​ពី​ប្រាំ​ទៅ​ប្រាំពីរ​ក្បាល​ក្នុង​ផ្ទៃសមុទ្រ នៃ​ប្រជុំ​កោះ​ខេត្ត​កែប​។ ចំណុច​នោះ​ជា​ចន្លោះ នៃ​កោះ​ពោធិ៍ កោះ​ម៉ាក់​ប្រា​ង កោះត្បាល់ និង​កោះ​អាចម៍សេះ​ដែលមាន​ចម្ងាយ​ប្រហែល​១២​គីឡូម៉ែត្រ​ពី​ដីគោក​។​

​លោកនាយ​ខណ្ឌ​បាន​បញ្ជាក់ថា វត្តមាន​សត្វ​ផ្សោត​នេះ ត្រូវបាន​អ្នកជំនាញ​របស់​អង្គការ UNDP ស្រាវជ្រាវ​រកឃើញ​ក្នុងអំឡុង​ឆ្នាំ​២០០៨ ដោយសារ​ចំណុច​នោះ​សម្បូរ​ស្មៅ​សមុទ្រ​។ ជាមួយនឹង​ការរកឃើញ​នេះ ដោយ​ការយកចិត្តទុកដាក់​ពី​ក្រសួងកសិកម្ម ទើប​មន្ត្រីជលផល ក៏​ដ​ច​ជា​អាជ្ញាធរខេត្ត​កែប បើក​កិច្ចសហការ​ជាមួយ​មន្ត្រី​ជំនាញ នៃ​អង្គការ​ UNDP និង​មានការ​ចូលរួម​ថែរក្សា​ពី​អង្គការ​អភិរក្ស​សមុទ្រ​កម្ពុជា​(MCC) ផង​នោះបាន​ធ្វើឱ្យ​បរិមាណ​ផ្សោត​កើន​ឡើងជា​បន្តបន្ទាប់​។ ប៉ុន្តែ​ភ្ញៀវ​ទាំងឡាយ​អាច​មើលឃើញ​លុះត្រា​តែមាន​ភាព​អត់ធ្មត់ ពោលគឺ​រង់ចាំ​គយគន់​ពេល​អាកាសធាតុ​ស្ងប់ស្ងាត់ និង​ផ្ទៃ​ទឹក​នៅ​នឹងថ្កល់​។

​លោក​គុជ វីរៈ​ក៏បាន​អំពាវនាវ​ផងដែរ​ថា​សូម​បងប្អូន​ប្រជា​នេសាទ​ទាំងអស់​ចូលរួម​ថែរក្សា​ទាំងអស់គ្នា ដោយ​មិន​ត្រូវធ្វើ​នេសាទ​ក្នុង​តំបន់​អភិរក្ស ឬ​ប្រើប្រាស់​ឧបករណ៍​ខុសច្បាប់ ដែល​ឈានទៅ​បំផ្លាញ​នូវ​ធនធាន​សមុទ្រ​ដ៏​កម្រ​នេះឡើយ​។ ប្រសិនបើ​មិនមាន​ការចូលរួម​ថែរក្សា​ទេ វា​នឹង​បាត់បង់​ទៅវិញ​៕