ក្រសួង​ប្រាប់ថាអាច​ដាំ​ដុះ​ស្រូវ​រដូវ​វស្សា​បាន​នៅ​សប្ដាហ៍ទី៣​នៃខែឧសភា​ឆ្នាំនេះ​

0
748

 

 

ស្រូវកម្ពុជា

ភ្នំពេញៈ ក្រសួងធនធានទឹក និងឧតុនិយម បានចេញសេចក្តីជូនដំណឹង ស្តីពីអាកាសធាតុនៅកម្ពុជា ដោយសារឆ្នាំនេះ កម្ពុជាទទួលឥទ្ធិពល El Nino ដូចនេះធ្វើឲ្យការមកដល់នៃរដូវវស្សា យឺតជាងធម្មតា ហើយការដាំដុះស្រូវវស្សាដើមរដូវ គួរចាប់ផ្ដើមនៅសប្ដាហ៍ទី៣ នៃខែឧសភា។

ក្រសួង​បញ្ជាក់ថា ជាទម្លាប់ ក្រោយរដូវចូលឆ្នាំ បងប្អូនប្រជាកសិករតែងតែចាប់ផ្ដើមការដាំដុះស្រូវរដូវវស្សា ប៉ុន្តែ ដោយសារឆ្នាំនេះ កម្ពុជាទទួលឥទ្ធិពល El Nino ដូចនេះធ្វើឲ្យការមកដល់នៃរដូវវស្សា យឺតជាងធម្មតា ហើយការដាំដុះស្រូវវស្សាដើមរដូវ គួរចាប់ផ្ដើមនៅសប្ដាហ៍ទី៣ នៃខែឧសភា

ក្រសួងបញ្ជាក់ថា រហូតមកដល់ពេលនេះ បាតុភូតអ៊ែលនីណូ (El Nino) នៅតែមានឥទ្ធិពល ហើយ​នឹងបន្ដគ្របដណ្ដប់លើប្រមាណពាក់កណ្ដាល នៃភពផែនដីទាំងមូល។

ក្រសួងបានអះអាងទៀតថា ប្រទេសកម្ពុជា ក៏នៅតែបន្តទទួលឥទ្ធិពលនេះដែរ ហើយ​កត្តានេះ​ធ្វើឲ្យសី​តុណ្ហ​ភាពអតិបរមា នៅកម្ពុជា បន្តកើនឡើង នឹងអាចឈានទៅដល់ ៤០-៤១ អង្សាសេ ក្នុងសប្តាហ៍នេះ។

ប៉ុន្ដែទោះជាយ៉ាងណាក៏ដោយ សម្រាប់ការកើនឡើងកម្ដៅដោយសារឥទ្ធិពល បាតុភូតអ៊ែលនីណូនេះ សម្រាប់ប្រទេសកម្ពុជា នឹងថយកម្ដៅទៅវិញនៅអំឡុងសប្ដាហ៍ទី៣ នៃខែឧសភា ឆ្នាំ២០១៩។

ក្រសួងបានឲ្យដឹងទៀតថា «បើនិយាយអំពីកម្ដៅ នឹងក្ដៅរហូតដល់សប្ដាហ៍ទី៣ នៃខែឧសភា ទើបចាប់ផ្ដើមថយទៅវិញដោយសារ មានភ្លៀងធ្លាក់មក ប៉ុន្ដែទន្ទឹមនឹងការថយកម្ដៅនេះ បាតុភូតផ្គរ រន្ទះ គឺនៅតែបន្ដមានរហូតដល់ចុងខែមិថុនា ទើបធូរស្រាលទៅវិញ»។

ស្ថានភាពភ្លៀងកាន់តែខ្សោយ ប៉ុន្តែបាតុភូតរន្ទះ និងខ្យល់កន្ត្រាក់ កើតឡើងញឹកញាប់ នឹងមានឥទ្ធិពលខ្លាំង ដូចនេះសូមអំពាវនាវឲ្យមានការប្រុងប្រយ័ត្ន ចំពោះបាតុភូតទាំងពីរនេះ។ ទន្ទឹមនេះ ក៏ត្រូវយកចិត្តទុកដាក់ចំពោះសុខភាព ដែលអាចមានការប៉ះពាល់ ដោយសារការកើនឡើងនៃកម្ដៅ៕