ស្ថានទូត​ខ្មែរ​ប្រ​ចាំ​ប្រ​ទេស​កូរ៉េខាង​ត្បូង​​រចនាខ្លោងទ្វារមហាសង្ក្រាន្តខ្មែរនៅកូរ៉េ បង្កប់អត្ថន័យ​មិន​ធម្មតា

0
2416
(រូបខ្លោងទ្វារមហាសង្ក្រាន្តខ្មែរ​នៅកូរ៉េខាងត្បូង/រូបភាព៖ ហ្វេសប៊ុកឯកឧត្តម ឡុង ឌីម៉ង់)

ក្នុង​ឱកាស​ពិធីបុណ្យ​ចូល​ឆ្នាំ​ខ្មែរ​ប្រ​ពៃណីជាតិ​ខាងមុខនេះ​​ស្ថានទូត​ខ្មែរ​ប្រ​ចាំ​ប្រ​ទេស​កូរ៉េខាង​ត្បូង​​នឹង​រៀបចំ «មហាសង្ក្រាន្តខ្មែរ​នៅកូរ៉េ​» ជា​លើកទី​ពីរ​របស់​ខ្លួន​ដើម្បីអប​អរ​ពីធីបុណ្យ​ប្រ​ពៃ​ណីជាតិ​ខ្មែរ​មួយ​នេះ។

​មិន​ឲ្យ​ខុស​គ្នា​ពី​សង្ក្រាន្ត​ដែល​រៀប​ចំ​នៅ​តាម​បណ្តា​ខេត្ត​រាជធានីក្នុង​ប្រ​ទេស​ ដែល​មាន​ដាក់​ខ្លោង​ទ្វារ​សង្ក្រាន្ត​នោះ​ នៅ​ឯ​កូរ៉េ​ខាង​ត្បូង​វិញស្ថានទូតខ្មែរ​ក៏មាន​ខ្លោងទ្វារ​ផ្ទាល់​ខ្លួន​ផង​ដែរ​ ដោយ​​មាន​រំលេច​នូវ​រចនាប័ទ្ម​ខ្មែរ និង​មាន​អត្ថន័យ​វិសេស​វិសាល​ផង​ដែរ​។

កាលពី​ល្ងាច​ម្សិល​មិញ ឯកឧត្តម ឡុង ឌីម៉ង់ ឯក​អគ្គរាជ​​ទូតខ្មែរ​ប្រ​ចាំ​ប្រ​ទេស​កូរ៉េ​ខាង​ត្បូង មាន​ប្រ​សាសន៍​តាម​វីដេអូ​ឡាយ ថា​ខ្លោង​ទ្វារ​នេះ​មាន​រចនាប័ទ្មខ្មែរ និងថា​ទទួល​បាន​ការ​គាំទ្រ​ច្រើនពី​ប្រ​ជា​ពល​រដ្ឋខ្មែរ​ក្រោយពី​បាន​ផ្សព្វផ្សាយ​តាម​បណ្តាញ​សង្គម​ហ្វេស​ប៊ុក។ ឯកឧត្តម​ចាត់​ទុក​ថា​ពេល​ដើរ​ចូល​តាម​ខ្លោងទ្វារ​នេះ​​ប្រៀបបាន​ដូចជា​ដើរ​ចូល​ភូមិ​ខ្មែរ ឬផ្ទះខ្មែរ ដូចនោះ​ដែរ។​

ឯកឧត្តម​ពន្យល់ថា​រូបភាព​ទេពប្រ​ណម​លើក​ដៃ​សំពះ​តំណាង​ឲ្យ​កាយវិការទន់​ភ្លន់​សម្រាប់​ទទួល​ស្វាគមន៍​​ភ្ញៀវ​ជន​ជាតិខ្មែរ​ និង​ភ្ញៀវ​បរទេស​ដែល​បានចូល​រួម​ក្នុង​កម្ម​វិធី​មហា​សង្ក្រាន្តនេះ។ មួយ​វិញ​ទៀត​ឯកឧត្តម​បន្តថា​រូប​ទេពប្រ​ណមនេះ​ក៏​បង្ហាញ​ពី​ការ​ជូនពរ​ជ័យដល់​សាធារណ​ជនក្នុង​ឱកាស​ឆ្នាំ​ថ្មី​ផង​ដែរ​។

ឯកឧត្តម​បន្តថា៖ «អ៊ី​ចឹង​ទេព​ប្រណម​នេះ​មាន​អត្ថន័យ​រួច​ទៅ​ហើយ ហើយ​ខ្លោងទ្វារនេះ​យើង​ផ្តោត​ឲ្យ​ស្អាត សមរម្យ​នេះ (ក៏)នឹងក្លាយ​ជាកន្លែង​ថត​រូប​របស់​បងប្អូន​​…​ថត​រូបជុំ​គ្នា​បង្ហាញ​ថា​បាន​មក​ចូល​រួម​​ព្រឹត្តិការណ៍​មហា​សង្ក្រាន្តនៅកូរ៉េ​ដែរ…ចូល​ដល់​ខ្លោងទ្វារនេះ​ដូច​ជាយើង​បាន​ចូល​ដល់​ប្រទេស​កម្ពុជា​ ចូល​ដល់​ភូមិ​ខ្មែរ​មួយ​»។

សម្រាប់​មហាសង្ក្រាន្ត​នៅ​កូរ៉េ​ខាង​ត្បូង​នេះ​នឹង​រៀប​ចំនៅ​ទីក្រុងសេអូល ចាប់ពី​ល្ងាច​ថ្ងៃទី​១៤ ​ខែមេសា មាន​ពិធី​ក្រុង​ពាលី និង​ព្រឹក​ថ្ងៃទី​១៥ នឹង​មាន​រៀបចំពិធី​សាសា​នាមួយចំនួន​ដូច​ជារាប់បាត្រ ពូន​ភ្នំខ្សាច់ និងស្រង់ព្រះ ជាដើម។ នេះបើ​តាម​ប្រ​សាសន៍ឯកឧត្តម ឡុង ឌីម៉ង់។

ក្រៅ​ពីពិធី​សាសនា​ក៏មាន​ដែរ​កម្មវិធីតាំងពិព័រណ៌ម្ហូបខ្មែរ លេងល្បែង​ប្រ​ជាប្រិយ ការ​ប្រ​កួត​ក្បាច់​គុណខ្មែរ ការ​បង្ហាញ​ម៉ូត​សម្លៀក​បំពាក់​ប្រ​ពៃណីខ្មែរ និង​មាន​ការប្រ​គំតន្រ្តី​ដែល​មាន​សិល្បករ​ខ្មែរ​ចូល​រួម​សម្តែង​ផងដែរ។ នេះ​បើ​តាម​ការ​ផ្សព្វផ្សាយ​របស់​ស្ថានទូត៕