លក់សង្វាក់តែតាមរបងសាលាអាចរកចំណូលបាន៧០ម៉ឺនរៀលក្នុង​១ថ្ងៃ

0
1605

ភ្នំពេញ៖ បើសិនជាបងប្អូនធ្វើដំណើរតាមផ្លូវ ៣០៤ ក្នុងសង្កាត់ បឹងកេងកង២ ជាប់​របង​សាលា​បឋ​ម​សិក្សា អង្គអេង បងប្អូននឹងឃើញមាន​អា​ជី​វ​កម្ម​លក់​សង្វាក់​តូច​មួយ​ជាប់​នឹង​របង​សាលា​បឋម​សិក្សា​​នោះ​មិនខាន ដែល​របរ​សាមញ្ញមួយនេះ អាច​ផ្ដល់​ចំណូល​ដល់​អាជីវករ​ក្នុង​១ថ្ងៃ​រហូត​ដល់ជាង​៧០ម៉ឺនរៀល។

អ្នក​ស្រី ចំរើន ​ម៉ូលីដា អាយុ៣៧ឆ្នាំ ម្ចាស់អាជីវកម្ម សង្វាក់បាត់ដំបង បានឲ្យ​ដឹង​ថា គាត់​ផ្ដើម​របរ​លក់​សង្វាក់នេះ តាំងពីឆ្នាំ២០១៤មកម្ល៉េះ ហើយ​កត្ដា​ដែល​អ្នក​ស្រី​បង្កើត​របរ​នេះ ព្រោះ​មិន​សូវ​មាន​អ្ន​ក​ធ្វើ ទើប​តែ​ឥលូវ​មាន​អ្នក​ចាប់ផ្ដើម​លក់​ដូច​គាត់​ច្រើន​។

អ្នក​ស្រីបន្តថា «ទោះជាមានអ្នកលក់ច្រើនយ៉ាងណា ក៏ខ្ញុំ​ មិន​ភ័យ​ខ្លាច​នឹង​ការ​លក់​មិន​ដាច់​ដែរ ព្រោះ​ខ្ញុំ​ មាន​​គន្លឹះ​ដែល​ធ្វើអោ​យលក់​ដាច់នឹងមានភ្ញៀវមកញុំាច្រើន»។​

សង្វាក់បាត់ដំបងរបស់បងស្រី បើក​លក់ពីម៉ោង៤ល្ងាច ដល់ម៉ោង៧យប់។ ចំពោះ​តំលៃវិញ​គឺ១​ឈុត​នៃសង្វាក់​តំលៃ៥០០០៛ មានសង្វាក់អាំង (គឺសាច់ណែម) នំបញ្ចុក អន្លក់ និងទឹកត្រី (ទឹកត្រីផ្អែម។ ភ្ញៀវ​​ដែលតែងតែមកញាំភាគច្រើនជាសិស្ស និងបុគ្គលិកធ្វើការផ្សេងៗ។

ដោយឡែកទាក់ទិននឹងគន្លឹះដែលធ្វើអោយសង្វាក់បាត់ដំបងរបស់គាត់ឆ្ងាញ់ ហើយ​លក់​ដាច់​នោះ ​អ្នក​ស្រី​បានបង្ហើប​ថា ទី១គឺតំលៃថោកសមរម្យ ទី២គឺ ជ្រើសរើសយកសង្វាក់ពីបាត់ដំបង សាច់ស​ង្វាក់​​ល្អ​ តែ​តម្លៃ​​ថ្លៃជាងសង្វាក់ធម្មតាបន្ទិច។

អ្នកស្រីបាននិយាយថា «សង្វាក់តំលៃថោក ក៏មានដែរ តែខ្ញុំ​មិនយកមកលក់ទេ ព្រោះ​គុណ​ភាព​មិន​សូវ​ល្អ​។ ខ្ញុំ​សុខចិត្តយករបស់ថ្លៃបន្តិចមក​លក់​វិញ។

ចំណុច​ខ្លាំង​ដែល​ធ្វើ​ឲ្យ​ភ្ញៀវ​មក​ហើយ​ចង់​មក​ទៀត​នោះ គឺ ទឹកត្រីរបស់សម្រាប់​ប្រើ​ជាមួយ​សង្វាក់​នេះ ធ្វើ​ពីទឹកដូង។

អ្នក​ស្រី​បន្ថែម​ថា​ ចំពោះទឹកត្រី​ដែលគេធ្វើ​យកមក​ញាំជា​មួយ​សង្វាក់​ភាគច្រើន​គឺធ្វើជាមួយ​ទឹកធម្មតា​តែមក​ស្រីគាត់មានគំនិតឆ្នៃប្រឌិតដោយយកទឹកដូងមកធ្វើជាទឹកត្រីជំនួសទឹកធម្មតា ទើប​រឹត​តែ​មាន​រស់ជាតិ​ពិសេស​។

អ្នកស្រី​ លីដា ថា «ខ្ញុំ​សុខចិត្ត ចំណេញតិច អោយតែមានភ្ញៀវមកញុំាច្រើន»។

បើ​តាម​អ្នក​ស្រី ចំណូ​ល​ពី​កា​​រលក់​ក្នុង​មួយ​ថ្ងៃ ​ ពេលខ្លះ​ចំនួន​ពីការ​លក់​មិន​ទៀង​ទេ​ថ្ងៃ​ខ្លះ​បាន​៥០ម៉ឺន​រៀល​ ៦០ម៉ឺនរៀល ថ្ងៃខ្លះ​បាន​ ៧០ម៉ឺនរៀលក៏មានដែរ។

គូរបញ្ជាក់ថា សង្វាក់បាត់ដំបងនេះ មានប្រភពមកពីខេត្តបាត់ដំបង ដោយមាន​រស់​ជាតិប្លែក ទើប​អ្នក​បាត់​ដំបងលក់ដាច់ច្រើន នឹងល្បីតៗគ្នា រហូតមានលក់​បន្ដ​នៅភ្នំពេញ៕