ភ្នំសន្ទុក ជាមណ្ឌលទេសចរណ៍វប្បធម៌ និងធម្មជាតិដ៏ពេញនិយមក្នុងខេត្តកំពង់ធំ

0
2647
Phnom Santuk is a popular cultural and natural tourist attraction in Kampong Thom Province
Phnom Santuk is a popular cultural and natural tourist attraction in Kampong Thom Province

កំពង់ធំ៖ ចេញដំណើរពីរាជធានីភ្នំពេញប្រមាណជាង ១៥០គីឡូម៉ែត្រ ឬចេញពីទីរួមខេត្តកំពង់ធំតែប្រមាណជាង ១០គីឡូម៉ែត្រប៉ុណ្ណោះ លោកអ្នកនឹងបានទៅដល់រមណីយដ្ឋានភ្នំសន្ទុក ដែលមានទីតាំងស្ថិតនៅភូមិស្វាយកាល្ប ឃុំកកោះ ស្រុកសន្ទុក ខេត្តកំពង់ធំ។ បច្ចុប្បន្ន ផ្លូវធ្វើដំណើរទៅកាន់រមណីយដ្ឋានមួយនេះ មានភាពងាយស្រួលរហូតដល់លើកំពូលភ្នំតែម្ដង។

នៅលើកំពូលភ្នំសន្ទុក មានទីសក្ការបូជា និងកន្លែងគួរឱ្យចង់ទស្សនាជាច្រើន ដែលសុទ្ធសឹងជាសម្បត្តិវប្បធម៌ប្រវត្តិសាស្ត្រ។ ក្រៅពីនោះ មានសត្វស្វាជាច្រើនរយក្បាល ព្រមទាំងសម្រស់ធម្មជាតិដ៏ស្រស់ត្រកាលនៅជុំវិញភ្នំ រហូតទៅដល់ភ្នំស្រះខ្ចៅ ភ្នំចម្ប៉ាជាដើម។ មួយវិញទៀត ភ្ញៀវទេសចរក៏អាចគយគន់ទេសភាពឯនាយខាងជើងបឹងទន្លេសាប ពីលើកំពូលភ្នំសន្ទុកបានផងដែរ។

Phnom Santuk is a popular cultural and natural tourist attraction in Kampong Thom Province
Phnom Santuk is a popular cultural and natural tourist attraction in Kampong Thom Province

ភ្ញៀវទេសចរដែលបានទៅដល់ខេត្តកំពង់ធំ ពិសេសគឺរមណីយដ្ឋានភ្នំសន្ទុកនេះ ក៏អាចសំចតចូលទស្សនាសិប្បកម្មចម្លាក់ថ្មរបស់ប្រជាជននៅភូមិស្វាយកាល្ប ដែលនៅអមសងខាងផ្លូវជាតិលេខ៦បានទៀតផង។

ជាការកត់សម្គាល់របស់មន្ទីរទេសចរណ៍ខេត្តកំពង់ធំ តាំងពីអង្គការយូណេស្កូសម្រេចចុះបញ្ជីតំបន់ប្រាសាទសំបូរព្រៃគុក ជាសម្បត្តបេតិកភណ្ឌពិភពលោករួចមក ភ្ញៀវទេសចរដែលបានទៅទស្សនាខេត្តកំពង់ធំទាំងមូល មានការកើនឡើងគួរឱ្យកត់សម្គាល់ ក្នុងនោះរមណីយដ្ឋានភ្នំសន្ទុក ក៏ត្រូវបានភ្ញៀវទេសចរទៅមកទស្សនាជាច្រើនហូរហែ។

មន្ទីរទេសចរណ៍ បានអំពាវនាវដល់ភ្ញៀវទេសចរជាតិ និងអន្តរជាតិ សូមអញ្ជើញទៅទស្សនារមណីយដ្ឋានភ្នំសន្ទុក និងរមណីយដ្ឋានដទៃទៀតនៅក្នុងខេត្តកំពង់ធំឱ្យបានច្រើនកុះករ ដើម្បីចូលរួមលើកស្ទួយយវិស័យទេសចរណ៍ជាតិ ឱ្យកាន់តែមានភាពរីកចម្រើនឡើង។ មិនតែប៉ុណ្ណោះ លោកក៏បានស្នើយ៉ាងទទូចដល់ភ្ញៀវទេសចរ ដែលបានទៅទស្សនារមណីយដ្ឋានភ្នំសន្ទុក សូមមានការយកចិត្តទុកដាក់ចំពោះការទុកសំរាម និងកាកសំណល់របស់ខ្លួនឱ្យបានត្រឹមត្រូវ។

Phnom Santuk is a popular cultural and natural tourist attraction in Kampong Thom Province
Phnom Santuk is a popular cultural and natural tourist attraction in Kampong Thom Province

ជាមួយគ្នានោះ ក៏បានទទូចដល់គណៈកម្មការវត្តនៅភ្នំសន្ទុកផងដែរ សូមគិតគូរបន្ថែមទៀតអំពីការរៀបចំធុងសំរាម ខណៈបច្ចុប្បន្នធុងសំរាមនានានៅលើកំពូលភ្នំសន្ទុក មិនទាន់មានគម្របសម្រាប់គ្របឱ្យជិតត្រឹមត្រូវនៅឡើយទេ ជាហេតុធ្វើឱ្យសត្វស្វានៅទីនោះកកាយ និងនាំយកទៅចោលពាសវាលពាសកាល ដែលនាំទៅដល់ការបះពាល់ដល់បរិស្ថាន និងសោភ័ណភាពនៅក្នុងរមណីយដ្ឋានដ៏សំខាន់មួយនេះ៕