មកដឹងពីការចំណាយ​ ​នឹងរយៈពេលសាងសង់​ព្រលានយន្ត​ហោះ​ថ្មី​នៅ​ខេត្ត​សៀមរាប!

0
827
រូបគំរូព្រលានយន្តហោះថ្មីខេត្តសៀមរាប

ការ​សាងសង់​ព្រលានយន្ត​ហោះ​ថ្មី​នៅ​ខេត្ត​សៀមរាប គ្រោងនឹង​​ចំណាយ​ថវិកា​ប្រមាណ​ ៨៨០​លាន​ដុល្លារ លើ​ផ្ទៃដី​ទំហំ ៧៥០​ហិចតា នៅក្នុង​ស្រុក​សូទ្រនិគម ​ជាយក្រុង​សៀមរាប​។ តាម​គម្រោង​នឹងត្រូវ​ប្រើពេល​យ៉ាង​ហោចណាស់ពី ៣ ទៅ ៥ឆ្នាំ ​ទើប​បញ្ចប់​ការសាងសង់។ នេះ​បើ​តាម​អ្នក​នាំ​ពាក្យ​លេខា​ធិការ​ដ្ឋាន​អាកាសចរ​ស៊ីវិល​កម្ពុជា (SSCA) លោក ស៊ិន ចាន់​សិរី​វុត្ថា​ បាន​ថ្លែង​ឲ្យដឹង​កាល​ពី​ថ្ងៃទី​១៩ ខែ​មីនា ឆ្នាំ២០១៨​។

ខណៈ​នេះ ក្រុម​អ្នក​អភិវឌ្ឍ​ព្រលាន​យន្តហោះបាន​នាំ​ក្រុម​កម្មករ​របស់​ខ្លួន និង​ឧបករណ៍​ ដោយ​កំពុង​ពង្រាប សម្អាត និង​ឈូស​ឆាយដី​នៅ​ទីតាំង​គម្រោង​​នោះ​ហើយ។ លោក ស៊ិន ចាន់​សិរី​វុត្ថា បាន​បន្ថែម​ថា ក្រុម​ការងារ នឹងធ្វើ​ការ​សាងសង់​ផ្លូវ​ចូល អគារ​ស្ថានីយ បំពាក់​អំពូល​បំភ្លឺ និង​គ្រឿង​បរិក្ខារ​ផ្សេងៗ​ទៀត​ដែល​ចាំបាច់​ទៅតាម​គម្រោង។

គម្រោង​សាងសង់​ព្រលានយន្តហោះ​ថ្មី​នេះ នឹងធ្វើឡើង​ជា​បី​ដំណាក់កាល៖

  • ដំណាក់កាល​ទី១. ក្រុមហ៊ុន​នឹង​វិនិយោគ​៥០០​លាន​ដុល្លារ​ក្នុងការ​ឈូសឆាយ សាងសង់​ស្ថានីយ និង​បំពាក់​គ្រឿង។​
  • ដំណាក់កាល​ទី​២. សាងសង់​ផ្លូវ ដែល​អាច​អនុញ្ញាតឱ្យ​យន្តហោះ​ដឹក​អ្នកដំណើរ​ខ្នាត​មធ្យម ដូចជា​យន្តហោះ ប្រភេទ​ប៊ូ​អី​ង​៧៣៧( Boeing 737) និង អ៊ែរ​ប៊ឺ​ស អេ​៣២០(Airbus A320) ចុះចតបាន។
  • និង​ដំណាក់​កាលទី​៣. មាន​ទឹកប្រាក់​៣០០​លាន​ដុល្លារ​ផ្សេងទៀត ត្រូវបាន​ត្រៀម​ទុក​ក្នុងការ​ពង្រីក​ព្រលាន​។​
  • កាលពី​ខែតុលា​ឆ្នាំ​២០១៧ កិច្ច​ព្រមព្រៀង​សាងសង់​ព្រលានយន្តហោះ​ថ្មី​នៅ​ខេត្ត​សៀមរាប​នេះ ត្រូវបាន​ចុះហត្ថលេខា​រវាង​រដ្ឋាភិបាល​កម្ពុជា និង​ក្រុមហ៊ុន Yunnan Investment Holdings Ltd ដែល​គ្រប់គ្រង​ដោយ​រដ្ឋ​ចិន​។ កិច្ចព្រមព្រៀង​នេះ​បានផ្តល់​សិទ្ធិ​ឱ្យ​ក្រុមហ៊ុន​ចិន គ្រប់គ្រង​អស់​រយៈពេល​៥៥​ឆ្នាំ​ក្រោម​យន្តការ (BOT)៕​ ប្រភព : sabay