រក​ឃើញ​ហ្វូស៊ីល អាយុ​រាប់​លាន​ឆ្នាំ​ បង្កប់​អាថ៌កំបាំង​ការ​កកើត​ប្រទេស​កម្ពុជា

0
786
ហ្វូស៊ីល ខ្យង គ្រំ និង​ងាវ​សមុទ្រ

កម្ពុជាបាន​រក​ឃើញ​ហ្វូស៊ីល អាយុ​រាប់​លាន​ឆ្នាំដែលបង្កប់​អាថ៌កំបាំង​ការ​កកើត​ប្រទេស​កម្ពុជា។​ បច្ចុប្បន្ន​ក្រុម​អ្នក​ស្រាវជ្រាវ​កំពុង​សិក្សា​លើ​សំណាក​ទាំង​នោះ និង​មិន​ទាន់​អាច​បក​ស្រាយ​លម្អិត​បាន​នៅ​ឡើយ​ទេ ខណៈ​រឿង​ខ្លះ​មាន​ប្រវត្តិ​រាប់​លាន​ឆ្នាំ​ទាក់ទង​នឹង​ការ​កកើត​ទឹកដី​កម្ពុជា​ទៀត​ផង។

ហ្វូស៊ីលដែលបានរកឃើញនោះគឺកាល​ពី​ខែ​កញ្ញា ឆ្នាំ​២០១៧ ដោយក្រុម​ស្រាវជ្រាវ​ នៃ​នាយក​បេតិកភណ្ឌ​ នៃ​ក្រសួង​បរិស្ថាន​បាន​រក​ឃើញ​ហ្វូស៊ីល ខ្យង គ្រំ និង​ងាវ​សមុទ្រ​ក្នុង​ដែន​ជម្រក​សត្វ​ព្រៃ​គូលែន​ព្រហ្ម​ទេព ក្នុង​ខេត្ត​ព្រះវិហារ​ដែល​អាច​មាន​អាយុ​រាប់​លាន​ឆ្នាំ។

ពេល​នោះ លឹម វណ្ណច័ន្ទ អនុ​ប្រធាន​ការិយាល័យ​អប់រំ​ផ្សព្វផ្សាយ​នៃ​ក្រសួង​បរិស្ថាន លើក​ឡើង​ថា “តាម​រយៈ​នៃ​ការ​រក​ឃើញ​នេះ ក្រុម​បច្ចេក​ទេស​អាច​សន្និដ្ឋាន​ថា ប្រទេស​កម្ពុជា​អាច​ធ្លាប់​ជា​បាតសមុទ្រ”។ ដោយសារ​​តែ​កង្វះ​អ្នក​ជំនាញ​ហ្វូស៊ីល​នេះ​នៅ​មិន​អាច​វាស់​អាយុកាល​ពិត​ប្រាកដ​នៅ​ឡើយ​ទេ ប៉ុន្តែ​លោក​អាច​សន្និដ្ឋាន​បាន​ថា ហ្វូស៊ីល​នេះ​មាន​អាយុ​មិន​តិច​ជាង​រាប់​លាន​ឆ្នាំ​នោះ​ទេ។

ដុំ​ហ្វូសីល​ទាំង​នោះ​មាន​រាង​ជា​ដុំ​ថ្ម​ ដែល​មាន​ផ្ដុំ​ទៅ​ដោយ​ងាវ​សមុទ្រ ងាវ ឬ​ក៏​គ្រំ​ដែល​ត្រូវ​បាន​រក​ឃើញ​នៅ​លើ​ទួល​មួយ​​ក្នុង​ភូមិ​សាស្ត្រ​នៃ​ដែន​ជម្រក​សត្វ​ព្រៃ​គូលែន​ព្រហ្ម​ទេព។ លោក លឹម វណ្ណច័ន្ទ បាន​រំពឹង​ថា ប្រសិន​ទីតាំង​នេះ​តំបន់​ដែល​រក​ឃើញ​ហ្វូស៊ីល​ត្រូវ​បាន​សិក្សា​ធ្វើ​កំណាយ​នោះ វា​នឹង​នាំ​ទៅ​ដល់​ការ​ស្វែង​យល់​ពី​ភាពចំណាស់​នៃ​ទឹកដី​របស់​កម្ពុជា ហើយ​អាច​ស្វែង​យល់​ពី​ប្រភេទ​សត្វ​ដែល​មាន​ប្រវត្តិ​ក្នុង​ប្រទេស​កម្ពុជា។