សត្វផ្សោតទន្លេមេគង្គនៅកម្ពុជាកើនឡើងដល់ចំនួន៩២ក្បាល

0
856
កូន សត្វ ផ្សោត កម្រ ឈ្មោះ អ៊ីរ៉ាវ៉ាឌី

ភ្នំពេញ ថ្ងៃទី២៣ ខែមេសា ឆ្នាំ២០១៨–ក្រុមអភិរក្ស បានអះអាងថា សត្វផ្សោត ទន្លេមេគង្គ កម្ពុជា មាន កំណើន ក្នុងរយៈពេលប៉ុន្មានឆ្នាំ ចុងក្រោយនេះ បើទោះបីជាពួកវាមួយចំនួនបានស្លាប់ដោយសារ សកម្ម​ភាព​មនុស្ស និងធម្មជាតិ។

លោក សេង ទៀក នាយកអង្គការមូលនិធិសកលសម្រាប់អភិរក្សធនធានធម្មជាតិ ហៅកាត់ថា(WWF) ប្រចាំ​កម្ពុជា បានឱ្យដឹងថា ការសិក្សាទៅលើចំនួនសត្វផ្សោតទន្លេមេគង្គនាពេល ចុងក្រោយនេះ បាន​បង្ហាញ​ថា ពួកវាមានចំនួន៩២ក្បាល ដែលជាចំនួនមួយស្ថិត ក្នុងកម្រិត ជឿជាក់បាន៩៥ភាគរយ ខណៈចំនួន​ប៉ាន់​ប្រមាណ​ស្ថិត​នៅក្នុងចន្លោះពី៨០ ទៅ១០៦ក្បាល។

ការបង្ហាញពីចំនួនសត្វផ្សោតទន្លេមេគង្គនេះ គឺធ្វើឡើងបន្ទាប់ពីការសិក្សាស្រាវជ្រាវក្នុងឆ្នាំ២០១៧ ដើម្បី​កំណត់​អត្តសញ្ញាណសត្វផ្សោតក្នុងវ័យចំណាស់ និងការចាប់កំណើតរបស់សត្វផ្សោតថ្មី ដែល​កំពុង​ប្រឈម​នឹងការ​គម្រាមកំហែងដោយសារសកម្មភាពមនុស្ស និងធម្មជាតិ។

សត្វផ្សោតខ្មែរ

ថ្លែងក្នុងសន្និសីទសារព័ត៌មានអំពីលទ្ធផលនៃការសិក្សាស្រាវជ្រាវសត្វផ្សោតទន្លេមេគង្គ នៅព្រឹកថ្ងៃទី២៣ ខែមេសា ឆ្នាំ២០១៨ លោក សេង ទៀក បានបញ្ជាក់ថា កំណើន នៃចំនួនសត្វផ្សោត ដែលត្រូវ​បាន​រកឃើញ​ថ្មី ក្នុងរយៈពេល២ ឬ៣ឆ្នាំម្តងនេះ គឺផ្អែកលើគំរូ វិភាគទិន្នន័យទៅចំនួនសត្វផ្សោតដែលស្គាល់ភិនភាគ សត្វ​ផ្សោត​ធ្លាប់​បានជួយសង្គ្រោះ ឱ្យរស់រានមានជីវិត អត្រានៃកំណើនសត្វផ្សោត និងការរកឃើញទៅ លើកំណើន​នៃចំនួន​សត្វផ្សោតដែលមិនទាន់កំណត់អត្តសញ្ញាណ ស្ថិតនៅក្នុងវ័យជំទង់ដោយទម្រង់ នៃព្រុយខ្នង របស់វា​នៅល្អនៅឡើយ។

យោងតាមរបាយការណ៍របស់រដ្ឋបាលជលផល បានបង្ហាញថា ចំនួនសត្វ​ផ្សោត​ដែល​មិនទាន់​កំណត់អត្ត​សញ្ញាណ មានការកើនឡើងពីចំនួន១៣ក្បាល ក្នុងឆ្នាំ២០១៥ ទៅ១៨ ក្បាល ក្នុងឆ្នាំ២០១៧ ក្នុងនោះ​កូន​ផ្សោតចំនួន១២ក្បាល ត្រូវបានកត់ត្រាក្នុងឆ្នាំ២០១៥ ចំនួន ១១ក្បាល ត្រូវបានកត់ត្រាក្នុងឆ្នាំ២០១៦ និងកូន​ផ្សោតចំនួន៩ក្បាល ត្រូវបានកត់ត្រាក្នុងឆ្នាំ ២០១៧ ខណៈចំនួនសត្វផ្សោត១៧ក្បាល ត្រូវបាន​ស្លាប់​ក្នុង​រយៈពេលដូចគ្នានេះ។

ឯកឧត្តម អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាល ជលផល បានមាន​ប្រសាស​ន៍ថា លទ្ធផលដែលទទួលបានក្នុងឆ្នាំ២០១៧នេះ គឺជាសញ្ញាវិជ្ជ មានក្នុងការស្តា​រ​ឡើង​វិញ​នូវ​សត្វ​ផ្សោត​​ទន្លេមេគង្គ សម្រាប់មនុស្សជំនាន់ក្រោយ ខណៈ ប្រភេទសត្វផ្សោតដ៏កម្រនេះ ជាគោល​ដៅ​ទេសចរណ៍​ដ៏សំខាន់ និងត្រូវបានចាត់ទុកជា សូចនាករនៃសុខភាពរបស់ប្រព័ន្ធទន្លេមេគង្គ ដែល​ប្រជាជន​ប្រមាណ​៦០លាន​នាក់ កំពុង ពឹងអាស្រ័យលើទន្លេនេះ ដើម្បីប្រកបរបរចិញ្ចឹមជីវិត។

ឯកឧត្តមបានបន្តថា កំណើន នៃសត្វផ្សោតនេះ បានផ្តល់នូវក្តីសង្ឃឹម និងកម្លាំងចិត្តដល់មន្ត្រីជលផល និងដៃគូ​អភិរក្ស រួមគ្នាខិតខំការពារ គ្រប់គ្រង និងអភិរក្សបន្តទៀត សម្រាប់គោលដៅទេសចរណ៍ធម្មជាតិ ខណៈ​ពួកវាកំពុងប្រឈមនឹងការគម្រាមកំហែងដូចជា ការជាប់មងនេសាទ ការបំពុល ការបោក​គ្រាប់​បែក​កែច្នៃដើម្បីធ្វើនេសាទខុសច្បាប់ សកម្មភាពនាវាចរណ៍ និងការសាងសង់ វារីអគ្គិសនីជាដើម។

សត្វផ្សោតទន្លេមេគង្គ ត្រូវបានចាត់ជាផ្នែកមួយយ៉ាងសំខាន់នៃមរតកធនធានធម្មជាតិ របស់ប្រទេសកម្ពុជា ហើយក៏ជាសត្វមួយដែលប្រជាជនកម្ពុជាគោរពបូជា និងប្រភពផ្តល់ ប្រាក់ចំណូល​មួយដ៏សំ​ខាន់​សម្រាប់​សហគមន៍ដែលចូលរួមក្នុងវិស័យទេសចរណ៍ធម្មជាតិ។

ចាប់ពីឆ្នាំ២០០៧ ដល់ឆ្នាំ២០១៧ អត្រាកំណើនជាមធ្យមប្រចាំឆ្នាំនៃសត្វផ្សោតទន្លេមេគង្គ គឺមាន០.៩៨ភាគរយ រីឯអត្រាស្លាប់ប្រចាំឆ្នាំគិតជាមធ្យមវិញ គឺ២.០១ភាគរយ។ បើប្រៀប ធៀបទៅនឹងរយៈ​ពេលពីឆ្នាំ​២០០៧ ដល់ឆ្នាំ២០១៣ អត្រាស្លាប់ប្រចាំឆ្នាំគិតជាមធ្យម គឺ៨ភាគរយ និង២.៤ភាគរយ ពីឆ្នាំ២០០៧ ដល់ឆ្នាំ២០១៧។

យោងតាមរបាយការណ៍របស់អង្គការ WWF បានបញ្ជាក់ថា ថវិកាប្រមាណ៣៥ម៉ឺនដុល្លារអាម៉េរិក ក្នុងមួយឆ្នាំ ក្នុងនោះពីរាជរដ្ឋាភិបាលកម្ពុជាប្រមាណ១៤ម៉ឺនដុល្លារ ត្រូវបាន ចំណាយសម្រាប់ការពារ និងអភិរក្សសត្វផ្សោត​នៅទន្លេមេគង្គ ឱ្យមានកំណើនឡើងវិញ។ ទន្ទឹមនេះ រាជរដ្ឋាភិបាលកម្ពុជា បានចេញនូវអនុក្រឹត្យស្តីពីការគ្រប់គ្រងតំបន់អភិរក្ស និងការ ពារសត្វផ្សោត ដោយហាមប្រាមការប្រើប្រាស់មងនេសាទនៅក្នុងតំបន់ស្នូល នៃដែនជម្រក របស់សត្វផ្សោតដែល​លាត​សន្ធឹង​ប្រវែង១៨០គីឡូម៉ែត្រ តាមបណ្តោយទន្លេមេគង្គចន្លោះ ពីទីរួមខេត្តក្រចេះ និងព្រំប្រទល់ប្រទេសឡាវ ក្នុងគោលបំណង​ការពារសត្វផ្សោតពីការជាប់ដោយចៃដន្យទៅនឹងមងនេសាទ។

ជាមួយគ្នានេះ មន្ត្រីឆ្មាំទន្លេ ក៏ត្រូវបានដាក់ប្រចាំការនៅ ប៉ុស្តិ៍ល្បាតចំនួន១៧ ដើម្បីអនុវត្តអនុក្រឹត្យនេះ ព្រមទាំងលិខិតបទដ្ឋានគតិយុត្តិផ្សេងៗ ទៀតដែលពាក់ព័ន្ធទៅនឹងការការពារ និងអភិរក្សធនធានជលផល៕