ដើម​ជ្រៃ​យក្ស​នឹងទឹកធ្លាក់​ជ្រៃ​ធំ​ក្នុង​ខេត្ត​មណ្ឌល​គី​រីទាក់ចិត្ត​អ្នក​ទស្សនា​រាប់មុឺននាក់​

0
1580

ខេត្ត​មណ្ឌល​គី​រី៖ នៅ​ពេល​ធ្វើ​ដំណើរ​ទៅ​កម្សាន្ត​នៅ​ទឹកធ្លាក់​ជ្រៃ​ធំ​ក្នុង​ខេត្ត​មណ្ឌល​គី​រី លោក​អ្នក​ប្រាកដជា​ចាប់អារម្មណ៍​ខ្លាំង​នឹង​ដើម​ជ្រៃ​យក្ស​មួយ​ដើម​ដែល​មាន​អាយុកាល​រាប់រយ​ឆ្នាំ និង​មាន​បែក​ធំ​ៗ​វែង​អន្លាយ​គួរ​ជាទី​គយគន់​ពេក​ក្រៃ​។

បើ​តាម​ការ​ឲ្យ​ដឹង​ពី​អ្នក​ភូមិ​នៅ​តំបន់​នោះ​ប្រាប់​ថា នៅ​ពេល​ដែល​ទឹកធ្លាក់​នេះ​ត្រូវ​បាន​គេ​រក​ឃើញ​គឺ​ដើម​ជ្រៃ​នេះ​ធំ​ខ្ពស់ត្រដែត​ស្រាប់​ហើយ​។ គល់​របស់​វា​ធំ​ទូលាយ និង​មាន​កម្ពស់​ប្រហែលជា​ជាង​៣០​ម៉ែត្រ ប៉ុន្តែ​អ្វី​ដែល​គេ​ចាប់អារម្មណ៍​បំផុត​នោះ​គឺ​បែក​របស់​វា​បាន​បែក​សាខា​ជា​ច្រើន​។ មែក​របស់​វា​ខ្លះ​មាន​ប្រវែង​ប្រហែលជា​២០​ទៅ​៣០​ម៉ែត្រ ដូច្នេះ​បើ​សរុប​ប្រវែង​ពី​មែក​ម្ខាង​ទៅ​មែក​ម្ខាង​ទៀត​ប្រហែលជា​៦០​ទៅ​៧០​ម៉ែត្រ​។ ការ​បែកមែក​សាខា​វែង​អន្លាយ​ជា​ច្រើន​បាន​បង្កើត​ជា​ម្លប់​ត្រឈឹងត្រឈៃ ខណៈ​នៅ​ជុំវិញ​ដើម​ជ្រៃ​យក្ស​នេះ​មាន​ដើមឈើ​ផ្សេង​ៗ​ជា​ច្រើន​ខ្ពស់ត្រដែត​។ ក្រោម​ម្លប់ឈើ​ត្រជាក់​ស្រេ​ប​នេះ​បង្កើត​ជា​កន្លែង​សម្រាប់​អង្គុយ​លេង និង​ទទួលទាន​អាហារ​យ៉ាង​សប្បាយ​រីករាយ ប៉ុន្តែ​ប្រសិនបើ​មាន​គ្នា​តែ​ម្នាក់​ឬ​ពីរ​នាក់​អាច​រអា​ខ្នង​។

នៅ​ចម្ងាយ​ពី​ដើម​ជ្រៃ​យក្ស​ប្រហែលជា​២០​ម៉ែត្រ​មាន​ទឹកធ្លាក់​បែក​សំពោង​ដែល​ទី​នេះ​ហៅ​ថា ទឹកធ្លាក់​ជ្រៃ​ធំ​។ បើ​តាម​វិ​ប​សាយ​ក្រសួងទេសចរណ៍​បាន​បង្ហាញ​ថា ទឹកធ្លាក់​នេះ​ក្នុង​រដូវប្រាំង ទឹកធ្លាក់​មាន​កម្ពស់​ដល់​ទៅ​១៥​ម៉ែត្រ និង​បន្ទាត់​ផ្ចិត​ប្រវែង​២​ម៉ែត្រ ប៉ុន្តែ​បើ​ក្នុង​រដូវវស្សា​វិញ ទឹកធ្លាក់​មាន​កម្ពស់​១១​ម៉ែត្រ និង​បន្ទាត់​ផ្ចិត​៨​ម៉ែត្រ​។

វា​មា​នទី​តាំងនៅ​ឃុំ​ដាក់​ដាំ ស្រុក​អូរ​រាំង​ដែល​មាន​ចម្ងាយ​ប្រមាណ​២០​គីឡូម៉ែត្រ​ពី​ក្រុង​សែន​មនោ​រម្យ ខេត្ត​មណ្ឌល​គី​រី​។ ដើម្បី​ទៅ​ដល់ទី​នោះ លោក​អ្នក​អាច​ធ្វើ​ដំណើរ​ដោយ​រថយន្ត​ក៏​បាន ឬ​ម៉ូតូ​ក៏​បាន​៕