ផ្លូវល្បឿនលឿនទី១ពី​ភ្នំពេញ ទៅខេត្ត​ព្រះសីហនុ មិនមែនសង់លើផ្លូវជាតិលេខ៤ គឺនៅទីតាំងពិសេស១ទៀត

0
1049
រូបតំណាង

ក្រសួង​សាធារណការ​ និង​ដឹកជញ្ជូន​ គ្រោង​នឹង​បញ្ចប់​ការ​សិក្សា​គម្រោង​ផ្លូវ​ល្បឿន​លឿនទី១នៅកម្ពុជា ​ក្នុង​ឆ្នាំ ២០១៨ ហើយ​ក្រសួង​ក៏​កំពុង​ត្រៀម​ទិញ​ដី​ដើម្បី​សាងសង់​លើទីតាំងថ្មីផង​ដែរ។

ឯកឧត្តម ស៊ុន ចាន់ថុល​ រដ្ឋមន្ត្រី​នៃ​ក្រសួង​សាធារណការ ​បាន​បញ្ជាក់​ជា​ថ្មី​ពី​គម្រោង​នេះ ​ក្នុង​ពិធី​សំណេះ​សំណាល​ជាមួយ​កម្មករ​នៅ​កំពង់ផែ​ស្វយ័ត​ក្រុង​ព្រះសីហនុ កាលពី​ថ្ងៃ​ទី​០១ ខែ​ឧសភា ឆ្នាំ​២០១៨។  ឯកឧត្តមអះអាង​ថា ​ក្រសួង​បាន​ចុះ​ហត្ថលេខា​ជាមួយ​ក្រុមហ៊ុន​ចិន​រួចរាល់​ហើយ ដើម្បី​កសាង​ផ្លូវ​ថ្មី​ទាំងស្រុង (ផ្លូវល្បឿនលឿន) ពី​ភ្នំពេញ ទៅខេត្ត​ព្រះសីហនុ ពោល​គឺ​ពុំ​មែន​សាងសង់​នៅ​លើ​ផ្លូវជាតិ​លេខ៤ ដែល​មាន​ស្រាប់​នោះ​ទេ។

ឯកឧត្តម ស៊ុន ចាន់ថុល​ កំពុងពិភាក្សា​ផ្លូវក្រវាត់​ក្រុង​

ដោយឡែក​ចំពោះ​ទីតាំង​ក្រសួង​ធ្លាប់​បង្ហើប​កាល​ពីកន្លង​ទៅ​ថា ការ​សាងសង់​ផ្លូវ​នេះ​​ គឺ​នឹង​ត្រូវ​យក​ពី​ចំណុច​ផ្លូវក្រវាត់​ក្រុង​ទី​៣ ឆ្ពោះ​ទៅ​កាន់​ខេត្ត​ព្រះសីហនុ​។ ផ្លូវ​ក្រវាត់​ក្រុង​នេះ​ មាន​ប្រវែង​សរុប​ចំនួន​៥២​គីឡូ​ម៉ែត្រ​ ពីចំណុច​ទំនប់​កប់​ស្រូវ​ ត​ភ្ជាប់​ពី​ផ្លូវជាតិ​លេខ​៥ និង​ឆ្លង​កាត់​ផ្លូវ​ជាតិ​លេខ​៤ ​ផ្លូវជាតិ​លេខ៣ ​ផ្លូវជាតិ​លេខ២ និង​ផ្លូវ​ជាតិ​លេខ១។ ​​

ម្យ៉ាង​បើ​តាម​ការ​វាយ​តម្លៃ​គម្រោង​ផ្លូវ​ល្បឿន​លឿន​នេះ បន្ទាប់ពីគម្រោងសិក្សាចប់រួចរាល់ នឹងចាប់ផ្ដើមសាងសង់ដើមឆ្នាំ ២០១៩ និងបញ្ចប់​ជា​ស្ថាពរ​នៅ​ឆ្នាំ​២០២៣ ពោល​គឺ​ប្រើ​រយៈ​ពេល​៤ឆ្នាំ​។ ​គម្រោង​ផ្លូវ​មួយ​នេះ ​មាន​លក្ខណៈ​ពិសេស​ធ្វើ​ពី​បេតុង​សរសៃ​ដែក ដែល​ក្នុង​នោះ​៤៧​គីឡូ​ម៉ែត្រ​ជា ផ្លូវ​បួន​គន្លង ពីរ​ទៅ​ពីរ​មក មាន​ទទឹង​ប្រវែង​២៥​ម៉ែត្រ និង៥​គីឡូម៉ែត្រ​ទៀត​មាន​ពីរ​គន្លង​សម្រាប់​ចូល ទៅ​កាន់​កំពង់​ផែ​ព្រះសីហនុ៕ ​​​​​​​

អត្ថបទ៖ ស៊ិន សាវ៉េត