ភ្នំពេញ៖ ដើមចន្ទន៍ក្រឹស្នាខ្មែរ កំពុងមានទីផ្សារខ្ពស់ ទាំងនៅក្នុងស្រុក និងក្រៅស្រុកជាពិសេសប្រទេសមជ្ឍិមបូព៌ា និងចិន ខណៈប្រជាជនកម្ពុជាមួយចំនួនស្ទើតែបំភ្លេចដំណាំនេះបាត់ទៅហើយ។
លោកស្រី កែវ សុគន្ធា នាយិកាក្រុមហ៊ុនធូបចន្ទន៍ក្រឹស្នាខ្មែរ មានប្រសាសន៍ថា «ប៉ុន្មានទស្សវត្សកន្លងមកនេះ ប្រជាកសិករខ្មែរយើង បានដាំដើមចន្ទន៍ក្រឹស្នាយ៉ាងច្រើន ជាពិសេស គឺប្រជាកសិករនៅខេត្តព្រះ សីហនុ ខេត្តកំពត ខេត្តកែប ខេត្តកោះកុង និងខេត្តពោធិ៍សាត់ ជាដើម ប៉ុន្តែរហូតមកដល់ពេលបច្ចុប្បន្ននេះ ប្រជាកសិករយើងមិនទាន់មានលទ្ធភាពគ្រប់គ្រាន់ ដើម្បីបង្កើតរោងចក្រចម្រាញ់ប្រេងចន្ទន៍ក្រឹស្នា និងកែច្នៃដើមចន្ទន៍ក្រឹស្នា ជាផលិតផលផ្សេងនៅឡើយទេ។ ជាពិសេសពួកគាត់ក៏មិនទាន់មានទីផ្សារក្នុងតំបន់និងអន្តរជាតិពិតប្រាកដដើម្បីធ្វើពាណិជ្ជកម្មដំណាំចន្ទន៍ក្រឹស្នារបស់ពួកគាត់ដែរ»។
កត្តាប្រឈមទាំងនេះ ហើយដែលធ្វើឲ្យប្រជាកសិករមួយចំនួនធំបាត់បង់ក្តីសង្ឃឹម និងលែងចង់ថែទាំងដំណាំចន្ទន៍ក្រឹស្នានេះរហូតដល់សព្វថ្ងៃ។
ចំណែកលោកស្រី នួន ប៊ុនណា មានប្រសាសន៍ថា ក្នុងរយៈពេល ១០ ឆ្នាំកន្លងមកនេះ មានដើមចន្ទន៍ក្រឹស្នាជាច្រើនលានដើម ត្រូវបានដាំនៅក្នុងប្រទេសកម្ពុជា ប៉ុន្តែការពង្រឹងគុណភាពនៅមានចន្លោះខ្វះខាតនៅឡើយ ដោយសារធនធានប្រើប្រាស់ក្នុងកិច្ចការនេះនៅមានកម្រិត។
អ្នកដាំដើមចន្ទន៍ក្រឹស្នាមួយចំនួនបានធ្លាក់ទឹកចិត្ត ដោយសារការលូតលាស់ដើមចន្ទន៍ក្រឹស្នាត្រូវប្រើពេលយូរ និងមិនសូវមានគុណភាព ហើយលទ្ធផលទទួលបាននៅមានកម្រិតទាប ដែលមិនអាចផ្តល់និរន្តរភាពដល់ការផ្គត់ផ្តង់ទីផ្សារ ។
តែថ្មីនេះដំណាំនេះហាក់មានសំទុះទីផ្សារខ្ពស់ ខណៈដែលប្រជាកសិករយើងនៅមិនទាន់មានលទ្ធភាពផ្គត់ផ្គង់ដល់តម្រូវការទីផ្សារ ជាក់ស្តែងក្រុមហ៊ុនថៃ First Capital Global Co.,ltd បានបោះទុនវិនិយោគ ១០០ លានដុល្លារ លើការដាំដុះដើមចន្ទន៍ក្រឹស្នា ១ លានដើម ព្រមទាំងសហការជាមួយក្រុមហ៊ុនធូបចន្ទន៍ក្រឹស្នាខ្មែរ ដើម្បីកសាងរោងចក្រចម្រាញ់ប្រេងចន្ទន៍ក្រឹស្នានៅខេត្តព្រះសីហនុ។
លោក សៀន ហ្គុ នាយកក្រុមហ៊ុន First Capital Global Co.,ltd ឲ្យដឹងថា «ដំណាំចន្ទន៍ក្រឹស្នាត្រូវបានយកទៅចម្រាញ់ជា ប្រេង ទឹកអប់ គ្រឿងសម្អាង ឱសថ អាស្រ័យតាមប្រភេទប្រេង ដូចជាប្រភេទប្រេងដែលចម្រាញ់ជាឱសថត្រូវនាំចេញទៅជប៉ុន ប្រភេទដែលចម្រាញ់ជាទឹកអប់ត្រូវនាំចេញទៅឌូបៃ និងសហព័ន្ធអារ៉ាបរួម»។
លោកស្រី កែវ សុគន្ធា ក៏បានបញ្ជាក់ថា «ដំណាំចន្ទន៍ក្រឹស្នានេះជាដំណាំដែលទទួលការគាំទ្រពីរាជរដ្ឋាភិបាលទាំងចរាចរណ៍ក្នុងស្រុក និងការនាំចេញ ជាក់ស្តែងផលិតផលធូបចន្ទន៍ក្រឹស្នានេះត្រូវបានចរាចរណ៍នៅកម្ពុជាជាង ៣ឆ្នាំរួចមកហើយ»។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា «កន្លងមកផលិតផលចន្ទន៍ក្រឹស្នាខ្មែរបាននាំចេញទៅកាន់ប្រទេសម៉ាឡេស៊ី អារ៉ាប កាន់តែពិសេសគឺប្រទេសនៅមជ្ឍិមបូព៌ា ដែលមានការពេញនិយមច្រើន អាចក្លាយជាទីផ្សារធំមួយនៅថ្ងៃក្រោយ»។
ឯកឧត្តមបន្ថែមថា កន្លងមកដំណាំចន្ទន៍ក្រឹស្នាមានដាំនៅប្រទេសវៀតណាម ឡាវ ម៉ាឡេស៊ី ហើយកម្ពុជាសព្វថ្ងៃមានដាំនៅខេត្តព្រះសីហនុ ចំណែកការដាំដុះក៏មិនត្រូវការដីល្អប៉ុន្មានដែរ ។
ជាចុងក្រោយ ឯកឧត្តម ប៉ាន សូរស័ក្តិ ក៏បានលើកទឹកចិត្តឲ្យប្រជាជនចាប់ផ្តើមស្រាវជ្រាវ និងយល់ដឹងពីដំណាំនេះឲ្យបានច្រើន ព្រោះដំណាំនេះកំពុងមានសំទុះទីផ្សារខ្លាំង ហើយរដ្ឋាភិបាលក៏បានជម្រុញឲ្យមានការដាំដុះ និងការវិនិយោគ ពីក្រុមហ៊ុននានាផងដែរ៕
