ម្ចាស់កសិដ្ឋានចិញ្ចឹមក្រពើកម្ពុជាទឹកភ្នែក ខណៈវៀតណាមទិញក្នុងតម្លៃថោកជាងពាក់កណ្តាល

0
974

ស្របពេលដែលតម្លៃត្រី សាច់ និងបន្លែ ដែលផលិតផលបាននៅកម្ពុជាកំពុងធ្លាក់ថ្លៃ ម្ចាស់កសិដ្ឋានចិញ្ចឹមក្រពើយកកូនលក់ ក៏កំពុងតែពិបាកចិត្តនឹងការទម្លាក់ថ្លៃពីឈ្មួញវៀតណាមផងដែរ។​

លោក ស៊ា បូរិន ម្ចាស់កសិដ្ឋានចិញ្ចឹមក្រពើខេត្តសៀមរាម បានឲ្យដឹងថា៖ ប្រជាជនកម្ពុជាដែលរស់នៅជាប់នឹងបឹងទន្លេសាប ភាគច្រើនបានចាប់ផ្តើមការងារចិញ្ចឹមក្រពើយកកូនលក់ ដើម្បីបង្កើន​ប្រាក់ចំណូលគ្រួសារ។

Image result for crocodile farm in siem reap

លោកបន្តថា៖ ក្រពើចាប់ផ្តើមផ្តល់ពងបានលុះត្រាតែវាមានអាយុពី ៦ ទៅ ៧ឆ្នាំ ហើយសម្រាប់ប្រជាកសិករដែលចាប់ផ្តើម​ចិញ្ចឹម ពួកគាត់ជាធម្មតាច្រើនទិញក្រពើដែលដល់អាយុត្រូវពងតែម្តង ដោយក្រពើដែលអាយុប្រមាណ ៦ឆ្នាំ មានប្រវែងជាង ៣ម៉ែត្រ ត្រូវបានទិញក្នុងតម្លៃប្រមាណ ១,២០០ដុល្លារអាមេរិក ក្នុងមួយក្បាល។

កាលពីមុន តម្លៃកូនក្រពើដែលទើបនឹងញាស់ថ្មីៗ ត្រូវបានឈ្មួញជាជនជាតិខ្មែរទទួលទិញក្នុងតម្លៃ​ពី ២០ ទៅ ២៥ដុល្លារ ក្នុងមួយក្បាល បន្ទាប់មកពួកគេនឹងយកទៅលក់បន្តឲ្យវៀតណាម ហើយវៀតណាម នឹងនាំចេញម្តងទៀត ទៅកាន់ប្រទេស​ចិន ព្រោះចិនជាទីផ្សារធំដែលទទួលទិញក្រពើច្រើនជាងគេ។

Image result for crocodile egg farm in siem reap

តម្លៃនៃកូនក្រពើបានបន្តធ្លាក់ថ្លៃតាំងពី ២៥ដុល្លារ មកនៅត្រឹម ១៦ដុល្លារ ហើយមកកល់ពេលនេះ វាអាចលក់បានត្រឹមតែ ១២ដុល្លារប៉ុណ្ណោះក្នុងមួយក្បាល ជាហេតុធ្វើឲ្យអ្នកចិញ្ចឹមក្រពើត្រូវទឹកភ្នែក និងកំពុងព្រួយបារម្ភណ៍ពីការធ្លាក់ថ្លៃបន្តទៀត។

គួរជម្រាបផងដែរថា ក្រពើអាចផ្តល់ពងបានមួយឆ្នាំតែម្តងគត់ ដែលមានប្រមាណពី ៣០ ទៅ៤០ពង ហើយវាអាចផ្តល់​ពងបានរហូតដល់ ៣០ឆ្នាំឯណោះ៕

 

ប្រភពពី Business Cambodia