ភ្ញៀវទេសចរ​ចិនកើនឡើង ១,៧ លាន​នាក់​នៅ​ក្នុងឆ្នាំ​នេះ

0
1575

រាជធានីភ្នំពេញ៖ ក្រសួង​ទេសចរណ៍​ព្យាករ​ថា នឹង​ទទួល​បាន​កំណើន​ភ្ញៀវទេសចរ​ចិន ១,៧ លាន​នាក់​នៅ​ឆ្នាំ​នេះ និង ២,៥ ​លាន​នាក់​នៅ​ត្រឹម​ឆ្នាំ​ ២០២០​។

ទំនាក់​ទំនង​រវាង​រដ្ឋាភិបាល​កម្ពុជា និង​ចិន​បាន​បង្ហាញ​ពី​ភាព​ល្អូកល្អិន​ក្នុង​រយៈពេល​ចុងក្រោយ​នេះ ហើយ​កំណើន​វិនិយោគ​ចិន និង​ទេសចរ​ចិន​មក​កម្ពុជា​ត្រូវ​បាន​គេ​មើលឃើញ​ថា មាន​កំណើន​យ៉ាង​ខ្លាំង​។

កាលពី​ឆ្នាំ​ ២០១៧ កម្ពុជា​ទទួល​ភ្ញៀវ​ទេសចរ​ចិន​សរុប​ ១,២ លាន​នាក់​ដែល​ជា​ចំនួន​នាំ​មុខ​គេ​ក្នុង​ចំណោម​ទេសចរ​បរទេស​មក​កម្ពុជា​ក្នុង​ចំណោម​ទេសចរ​បរទេស​សរុប ៥,៦ ​លាន​នាក់​។

ក្នុង​កិច្ចប្រជុំ​បូក​សរុប​របាយការណ៍​ប្រចាំ​ឆ្នាំ​របស់​ក្រសួង​ទេសចរណ៍​កាលពី​ថ្ងៃ​ម្សិលមិញ​លោក ថោង ខុន រដ្ឋមន្ដ្រី​ក្រសួង​ទេសចរណ៍​ថ្លែង​ថា៖ «​ដោយសារ​តែ​កម្រិត​ជីវភាព​រស់នៅ​ជា​មធ្យម​នៅ​ក្នុង​ប្រទេស​ចិន​បាន​កើនឡើង ដូច្នេះ​កំណើន​ការមក​ដល់​ភ្ញៀវ​ទេសចរ​ចិន​នឹង​កើនឡើង​»​។

លោក​ថ្លែង​ថា​៖ «​យើង​ត្រូវតែ​លើក​កម្ពស់​ឆ្នេរ​ដ៏ស្រស់ស្អាត និង​ប្រាសាទ​អង្គរ​របស់​យើង​នៅក្នុង​បដិសណ្ឋារកិច្ច​ដ៏ល្អ​ដើម្បី​ទាក់ទាញ​ការចូល​មក​របស់​ភ្ញៀវទេសចរ​បន្ថែម​ទៀត​»​។

លោក​បន្ថែម​ថា គ្រាន់តែ​ឆ្នេរសមុទ្រ​នៅ​ក្រុង​ព្រះសីហនុ​តែ​មួយ អត្រា​កំណើន​នៃ​ការ​មក​ដល់​របស់​ជនជាតិ​ចិន​មាន​ចំនួន ១៧០ ​ភាគរយ​។

លោក​ថ្លែង​ថា​៖ «​យើង​ចាំបាច់​ត្រូវ​ធានា​ទីក្រុង​ស្អាត និង​បៃតង និង​គុណភាព​សេវា​ព្រម​ទាំង​សន្ដិភាព និង​សន្ដិសុខ​ជា​អ្នក​ដើរ​តួនាទី​ដ៏សំខាន់​នៃ​ឆ្នាំ​ ២០១៨»​។

លោក​បន្ត​ថា​៖ «​ខ្ញុំ​មិន​បារម្ភ​អំពី​លំហូរ​នៃ​ការ​ចូល​មក​របស់​ជនជាតិ​ចិន យើង​កំពុង​ស្ថិត​ក្នុង​​ទីផ្សារ​សេរី បើ​ពួកគេ​គោរព​តាម​ច្បាប់ និង​ការបង់ពន្ធ​ត្រឹមត្រូវ នោះ​គឺ​ល្អ​សម្រាប់​ពួកយើង ពេល​នេះ​យើង​ចាំបាច់​ត្រូវ​លើក​កម្ពស់​គុណភាព​ធនធាន​មនុស្ស​សម្រាប់​ផ្ដល់​សេវា​ល្អ និង​ទទួល​បាន​ការងារ​ជាច្រើន​»៕