ចិន ចង់​កែប្រែ​ខេត្តកំពត ឱ្យ​ក្លាយជា​តំបន់​សេដ្ឋកិច្ច​ពិសេស​មិន​ធ្លាប់​មាននៅ​កម្ពុជា

0
1020

ក្រុមហ៊ុន​ចិន Shanghai Hongyuan Investment Co.,Ltd  មានបំណង​ដាក់ទុន​រកស៊ី និង​កែប្រែ​ខេត្តកំពត ឱ្យ​ក្លាយជា​តំបន់​សេដ្ឋកិច្ច​ពិសេស​មិន​ធ្លាប់​មាននៅ​កម្ពុជា ព្រមទាំង​ធ្វើឱ្យមាន​ការរីកចម្រើន​ផ្នែក​សេដ្ឋកិច្ច​ក្នុង​តំបន់ ពោលគឺ​ចង់ឱ្យ​ខេត្ត​នេះ​ទទួលបាន​នូវ​ភាពជឿនលឿន​ដូច​ខេត្ត​ស៊ិន​ចូ​វ របស់​ប្រទេស​ចិន ឬ​ដូច​ប្រទេស​សិង្ហ​បុរី​ទៀតផង។ នេះ​បើតាម​ការបញ្ជាក់​របស់​លោក ហុង ងៀ​ន ស្ថាបនិក​ក្រុមហ៊ុន Shanghai Hongyuan ក្រោយ​ជំនួប​ពិភាក្សា​ជាមួយ​លោក ជាវ តា​យ អភិបាល​ខេត្តកំពត កាលពី​ថ្ងៃទី៣០ ខែតុលា ឆ្នាំ២០១។

លោក​បានកត់សម្គាល់​ឃើញ​ថា កម្ពុជា​មិនទាន់មាន​គម្រោង​ទាំងនេះ​នៅឡើយ​ទេ។ ជា​បំណង​ដ៏​ធំ​របស់​ក្រុមហ៊ុន គឺ​បាន​ផ្តោតលើ​ការវិនិយោគ​វិស័យ​គមនាគមន៍ ដូចជា​ការធ្វើ​កំពង់ផែ ព្រលានយន្តហោះ ផ្លូវ​រថភ្លើង​ល្បឿន​លឿន​កំពត-ភ្នំពេញ កំពត-ព្រះសីហនុ និង​គម្រោង​មួយចំនួនទៀត។

លោក​ប្រធាន​ក្រុមហ៊ុន​បន្តថា លោក​ក៏បាន​សំណូមពរ​ឱ្យ​អាជ្ញាធរខេត្ត​គាំទ្រ និង​ស្នើសុំ​ជំនាញ​ពាក់ព័ន្ធ​រួមសហការ ព្រមទាំង​ធានា​ទាំង​សន្តិសុខ ក៏ដូចជា​ផ្លូវច្បាប់​ផងដែរ។ តាម​ការរំពឹង​របស់​លោក​ផ្ទាល់ គម្រោង​វិនិយោគ​ដ៏​ធំ​នៅ​ខេត្តកំពត​នេះ គឺ​នឹង​អាច​ដំណើការ​បាន​រហូតដល់​ទៅ៨០ភាគរយ។

ពាក់ព័ន្ធ​នឹង​គម្រោង​ខាងលើនេះ លោក ជាវ តា​យ បាន​មានប្រសាសន៍ថា បំណង​ក្រុមហ៊ុន​មកពី​ប្រទេស​ចិន​មួយ​នេះ គឺ​ចង់​ធ្វើឱ្យ​ខេត្តកំពត​ជឿនលឿន​ដូច​បណ្តា​ក្រុង​ខេត្ត​មួយចំនួន​របស់​ប្រទេស​គេ ស្របពេល​កម្ពុជា​បច្ចុប្បន្ន​កំពុងមាន​សុខសន្តិភាព ស្ថិរភាព​នយោបាយ ក៏ដូចជា​ការធានា​នូវ​ផ្លូវច្បាប់​គ្រប់គ្រាន់​សម្រាប់​អ្នកវិនិយោគ​ទាំង​ក្នុង និង​ក្រៅ​ស្រុក​ដែល​មក​បណ្តាក់ទុន។ លើសពីនេះ ក្រុមហ៊ុន​នេះ បាន​អះអាងថា នឹង​ព្យាយាម​ធ្វើឱ្យ​ល្អ​ជាង​បណ្តា​ក្រុមហ៊ុន​ទាំងឡាយ​ដែលមាន​នៅ​កម្ពុជា។

លោក​អភិបាលខេត្ត​បាន​បញ្ជាក់ថា ទោះបី​នោះ​ជាការ​អួតអាង ឬ​យ៉ាងណា ក៏​មិនទាន់​ដឹង​នៅឡើយ ព្រោះ​ពួកគេ​កំពុង​សិក្សា ហើយ​ស្ថិតក្រោម​ដំណើរ​ទស្សនកិច្ច​ប៉ុណ្ណោះ។ លោក​ថា ក្នុងនាម​រដ្ឋបាលខេត្ត លោក​ត្រូវតែ​ស្វាគមន៍ និង​ជំរុញ​ក្រុមហ៊ុន​ឱ្យ​លើកឡើង​ពី​គម្រោង​សកម្មភាព​ជាក់លាក់​ដើម្បី​ដាក់​ឆ្លង​ក្រុមប្រឹក្សា​អភិវឌ្ឍន៍​កម្ពុជា រួច​បន្ត​ស្នើសុំ​ទៅ​ប្រមុខ​រាជរដ្ឋាភិបាល​ក្នង​ការសម្រេច៕