អ្វីជាចំណុចសំខាន់ក្នុងថ្ងៃបុណ្យវិសាខបូជា?

0
1845

ភ្នំពេញ៖ គ្រប់ប្រទេសកាន់ព្រះពុទ្ធសាសនា គឺតែងប្រារព្វកម្មវិធីបុណ្យវិសាខបូជាដូចជាប្រទេសខ្មែរជាដើម។ បុណ្យវិសាខបូជា ញជាបុណ្យដ៏សំខាន់បំផុតក្នុងព្រះពុទ្ធសាសនា។ ហើយមកទល់ពេលនេះ ឱវាទរបស់ព្រះអង្គគឺកំពុងតែត្រូវបានចាប់អារម្មណ៍ក្នុងបណ្តាប្រទេសអ៊ឺរ៉ុបផ្នែកខាងសមាធិយ៉ាងខ្លាំង។

ដើមឡើយបណ្តាប្រទេសមួយចំនួនមិនបានទទួសលស្គាល់ព្រះពុទ្ធសាសនាទេដោយគិតថា ព្រះពុទ្ធសាសនា​សម្តែង​អំពីជំនឿដូនតា។ តែនៅចុងទសវត្សនេះ មានឃើញបរទេសជាច្រើនចូលមកសិក្សាព្រះធម៌​ ធ្វើសមាធិច្រើនជាងខ្មែរគួរឱ្យកត់សម្គាល់។ អ្វីដែលធ្វើឱ្យពិភពលោកទាំងមូលមានការភ្ញាក់ផ្អើល និងទទួលស្គាល់គឺនៅ​ថ្ងៃ​ទី​១៥ ខែ​ធ្នូ ឆ្នាំ​១៩៩៩ អង្គការសហប្រជាជាតិបាន​ប្រកាស​ទទួល​ស្គាល់​បុណ្យ​វិសាខ​បូជា​ជា​ទិវា​បុណ្យ​អន្តរជាតិ ដោយ​មាន​ការ​ស្នើ​សុំ​ពី​ប្រទេស​នានា​នៅ​លើ​សកលលោក ដែល​គោរព​ព្រះ​ពុទ្ធ​សាសនា ក្នុង​នោះ​រួម​ទាំង​កម្ពុជា​ផង​ដែរ។

លោក​ធម្ម​បណ្ឌិត ហេង មណីចិន្ដា នាយក​អង្គការ​ពុទ្ធ​សាសនា​ដើម្បី​អភិវឌ្ឍន៍​នៅ​ស្រុក​សង្កែ ខេត្ត​បាត់ដំបង បាន​មាន​ប្រសាសន៍​អំពី​គោល​សំខាន់​ៗ​ដែល​អង្គការ​សហ​ប្រជាជាតិ​បាន​សម្រេច​ដាក់​បញ្ចូល​ជា​ទិវា​បុណ្យ​អន្តរជាតិ​នេះដូច្នេះថា៖«ព្រោះគេ​ឃើញ​នូវ​គុណ​ប្រយោជន៍​របស់​ព្រះ​ពុទ្ធ​សាសនាសំខាន់ៗដូចជា៖

ទី​១ ជា​សាសនា​ដែល​មាន​ចំណាស់​យូរ ២៥៦០​ឆ្នាំ​ទៅ​ហើយ

ទី​២ ជា​សាសនា​មាន​គោលការណ៍​សន្តិភាព មិន​កាប់​សម្លាប់​គ្នា គោរព​សិទ្ធិ​គ្នា​ក្នុង​ការ​រស់​នៅ​ទៅ​វិញទៅមក

ទី​៣ ពុំ​ដែល​មាន​សង្គ្រាម​ដែល​កើត​ឡើង​ក្នុង​នាម​ព្រះ​ពុទ្ធ​សាសនា​នោះ​ទេ ហើយ​មាន​ប្រជាជន​ដល់​ទៅ​ជាង ៥​រយ​លាន​នាក់​នា​បច្ចុប្បន្ន​នេះ​នៅ​លើ​ពិភពលោក​ទាំង​មូល បាន​កាន់​ព្រះ​ពុទ្ធ​សាសនា…។កត្តា​ទាំង​អស់​នេះ​ហើយ​ដែល​អង្គការ​សហ​ប្រជាជាតិ​បាន​លើក​តម្លៃ​ព្រះ​ពុទ្ធ​សាសនា ថា បាន​ចូលរួម​ចំណែក​ដ៏​ក្រាស់ក្រែល​ធំធេង​ណាស់​ក្នុង​សន្តិភាព​ពិភពលោកនិង​ការ​រួម​រស់​ជាមួយ​គ្នា​ដ៏​សុខ​ស្ងប់…»។

ចាប់​តាំង​ពី​អង្គការ​សហ​ប្រជាជាតិ​បាន​ទទួល​ស្គាល់​វិសាខ​បូជា ជា​ទិវា​បុណ្យ​អន្តរជាតិ​មក ប្រទេស​ដែល​គោរព​ព្រះ​ពុទ្ធ​សាសនា​ជា​ច្រើន​នៅ​លើ​សកលលោក បាន​នាំ​គ្នា​ប្រារព្ធ​ធ្វើ​ពិធី​បុណ្យ​វិសាខ​បូជា​ជា​សកល ដោយ​ដាក់​ឈ្មោះ​ថា UN​-​វិសាខ ឬ​វិសាខ​​បូជា​នៃ​អង្គការ​សហ​ប្រជាជាតិ។

មានហេតុ៣យ៉ាងសំខាន់ៗក្នុងថ្ងៃបុណ្យវិសាខបូជាដែលធ្វើឡើងដើម្បីរំលឹកដល់៖

១-ព្រះអង្គ​ទ្រង់​ប្រសូត្រ

ព្រះអង្គ​ទ្រង់​ប្រសូតិ​នៅ ថ្ងៃ​សុក្រ ពេញ​បូណ៌មី ខែ​វិសាខ ឆ្នាំ​ច វេលា​ជិត​ថ្ងៃ​ត្រង់ មុន ពុទ្ធសករាជ ៨០​ឆ្នាំ ។ នៅ​ឧទ្យានលុម្ពិនី ព្រៃ​សាលព្រឹក្ស ចន្លោះ​នគរ​ទាំង​ពីរ គឺ​កបិលពស្តុ និង ទេវ​ទហៈ។ ឧទ្យាន​លុម្ពិនី សព្វ​ថ្ងៃ​នេះ​ស្ថិត​នៅ​ក្នុង​ប្រទេស​នេប៉ាល់  មាន​ចម្ងាយ​២៧គ.ម. ពី​ព្រំដែន នៃ​ប្រទេស​ឥណ្ឌា ។

២-​ព្រះអង្គទ្រង់​ត្រាស់​ដឹង​អនុត្តរសម្មាសម្ពោធិញ្ញាណ

ព្រះ​អង្គ​ទ្រង់​ត្រាស់​ដឹង  នៅ​ថ្ងៃ​ពុធ  ពេញ​បូណ៌មី ខែ​វិសាខ ឆ្នាំ​រកា​វេលា ជិត​ភ្លឺ មុន​ពុទ្ធសករាជ​៤៥​ឆ្នាំ ក្នុង​ព្រះជន្ម​៣៥​ឆ្នាំ។ ទី​ស្ថាន​ដែល​ព្រះអង្គ​បាន ត្រាស់​ដឹង​ជា​សព្វញ្ញូពុទ្ធ ហៅ​ថា​ពុទ្ធគយា​ស្ថិត​នៅ​ក្នុង  រដ្ឋ​ពីហា ( Bihar ) ប្រទេស​ឥណ្ឌា។

៣-ព្រះអង្គ​ទ្រង់​ចូល​ព្រះនិព្វាន

ព្រះអង្គ​ទ្រង់​បរិនិព្វាន ក្នុង​ថ្ងៃ​អង្គារ ពេញ​បូណ៌​មី ខែ​វិសាខ ឆ្នាំ​ម្សាញ់  វេលា​ជិត​បែក​បច្ចូសម័យ មុន​ពុទ្ធសករាជ ១ថ្ងៃ​ក្នុង ព្រះជន្ម ៨០​ឆ្នាំ គត់  ចន្លោះ​សាល​ព្រឹក្ស​ទាំង​គូ ក្នុង​ក្រុងកុសិនារា ។ សព្វ​ថ្ងៃ​នេះ  ទី​ក្រុង កុសិនារា ត្រូវ​បាន​គេ​ហៅ​ថា ក្រុង​កុសិនាហ្គារ៍ (កុសិនគរ) ឬ​ហៅថា​ក្រុង​កាស្យា ស្ថិត​នៅ​ក្នុង​រដ្ឋឧត្តរ​ប្រទេសរបស់​ឥណ្ឌា។

ដើម្បីបានបុណ្យកុសល និងបានរួចចាកផុតទុក្ខគ្រប់ជាតិនោះៗ ពុទ្ធសាសនិកគប្បី៖

១.មិនត្រូវធ្វើអំពើបាបទំាងពួង ចំពោះមនុស្ស សត្វ

២.ត្រូវព្យាយាមសន្សំសេចក្តីល្អឱ្យរឿយៗ មានការផ្តល់ក្តីស្រឡាញ់ កាមេត្តា ករុណា

៣.ត្រូវសម្អាតចិត្តឱ្យស្អាត មានចិត្តគំនុំ ខឹងសម្បា ជាដើម៕