ខ្លាសេដ្ឋកិច្ចថ្មីនៅអាស៊ី«កម្ពុជា»ចំណាយជាង២០០លាន$ក្នុង១ឆ្នាំនាំបន្លែបរទេសចូលស្រុក

0
899

កម្ពុជាជាប់ឈ្មោះជាខ្លាសេដ្ឋកិច្ចថ្មីនៅអាស៊ី និងជាប្រទេសអំណោយផលផ្នែកសិកម្មនោះ បាន​ចំណាយ​ថវិកាជាង២០០លានដុល្លារអាមេរិកក្នុង១ឆ្នាំៗ ដើម្បីនាំចូល បន្លែពីបរទេស​មកផ្គត់ផ្គង់​ទីផ្សារ​ក្នុងស្រុក ខណៈផលិតផលក្នុងស្រុកនៅមានបរិមាណទាបនិងតម្លៃខ្ពស់។ នេះបើយោង​តាមការ​ប្រកាសព័ត៌មានរបស់ AKP នាពេលថ្មីៗ។

​បើតាមរបារណ៍ពីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ក្នុង១ថ្ងៃៗ​កម្ពុជា​ត្រូវការ​នាំចូល​បន្លែប្រមាណជា៤០០តោន ដើម្បីផ្គត់ផ្គង់ទីផ្សារក្នុងស្រុក ស្របពេល ដែលទិន្នផលប​ន្លែក្នុង​ស្រុក នៅមិនទាន់ឆ្លើយតបគ្រប់គ្រាន់ ទៅនឹងតម្រូវការ ទីផ្សារនៅឡើយ ដោយសា​រតែ​ការ​ដាំដុះ​របស់​ប្រជាកសិករខ្មែរនៅជួបបញ្ហា និងខ្វះបច្ចេក ទេសក្នុង​ការផលិត​ឱ្យទទួល​បាន​បរិមាណ​ច្រើន​នៅឡើយ។



លោក ច័ន្ទ សុផល អ្នកវិភាគសេដ្ឋកិច្ចបានលើកឡើងថា តាមការសិក្សា របស់​លោក​គ្រាន់​តែផ្សារ១​កន្លែង​នៅរាជធានីភ្នំពេញ បានដាក់លក់បន្លែប្រមាណជា ៧០តោន ក្នុងនោះមាន៧០ភាគរយ ជាបន្លែ​នាំមកពីក្រៅប្រទេស ដូចជាប្រទេសថៃ និងវៀតណាមជាដើម ចំណែក​បន្លែ​របស់​ប្រជា​កសិករ​កម្ពុជា មានប្រមាណតែ៣០ភាគ រយប៉ុណ្ណោះ។

លោកបាន បន្តថា ការនាំចូលបន្លែពីក្រៅប្រទេសច្រើនបែបនេះ មូលហេតុ​ដោយសារ​តែបន្លែ​ទាំង​នោះ មានតម្លៃថោក និងស្របពេលដែលកសិករខ្មែរ មិនទាន់អាចដាំដុះបន្លែគ្រប់គ្រាន់សម្រាប់ផ្គត់ ផ្គង់​តម្រូវការទីផ្សារ។

លោកបានពន្យល់ថា បញ្ហាអាកាសធាតុ និងខ្វះចំណេះដឹង បច្ចេកទេស របស់​កសិករ​ខ្មែរក្នុង​ការផលិត ក៏ជាមូលហេតុបន្ថែមទៀតផងដែរ។

​បើតាមការឱ្យដឹងពីតំណាងកសិដ្ឋានដាំដុះបន្លែបែបសរីរាង្គវិញ លោក គង់ ស៊ីណា បានបញ្ជាក់ថា នៅ​ក្នុង១ថ្ងៃៗបន្លែសរីរាង្គ ដែលត្រូវបានដាំដុះក្នុងកសិដ្ឋានទាំងពីរទីតាំងនៅ ពិជនិល និង​ស្រែ​អំបិល​របស់​លោក អាចមានសមត្ថភាពផលិតបន្លែបានចំនួន១តោន ក្នុង មួយថ្ងៃ តែអាច​បញ្ចេញ​លក់​ទៅលើ​ទីផ្សារ បានតែចំនួន៥០០គីឡូក្រាម ក្នុង១ថ្ងៃប៉ុណ្ណោះ ។

លោកបានបន្ថែមថា ការដាក់លក់បន្លែរបស់កសិដ្ឋានលោកបច្ចុប្បន្ន គឺធ្វើឡើងតាមការចែក ចាយ និង​ផ្គត់ផ្គង់តាមបណ្ដាសណ្ឋាគារ ភោជនីយដ្ឋានធំៗ និងផ្សារទំនើប ហើយមានបិទ ស្លាក​សញ្ញា​បន្លែ​សរីរាង្គ​ផងដែរ ហើយក៏មិនមានដាក់លក់នៅក្នុងទីផ្សារធម្មតានោះទេ ព្រោះថា តម្លៃបន្លែទាំងនេះ អាចខ្ពស់​ជាងបន្លែលើទីផ្សារធម្មតា។

បណ្ឌិតយ៉ង សំាងកុមារ ធ្លាប់មានប្រសាសន៍ថា បញ្ហាធំៗរបស់កសិករខ្មែរយើងតែងជួបប្រទះ មាន៣ចំណុច៖កសិករខ្មែរយើងមិនទាន់វិវត្តន៍ខ្លួនទៅជាអ្នកជំនួញ-កសិកម្ម, កសិករខ្មែរនៅ​មិនទាន់​មានទម្លាប់​ចេះសហការគ្នាធ្វើកសិកម្មនៅឡើយ និងមិនទាន់មាន​អ្នកជួយ​គាំទ្រច្បាស់​លាស់​លើការ​ងារក​សិកម្ម។ កត្តាសំខាន់ទំាងនេះហើយ បានធ្វើឲ្យកសិករខ្មែរ នៅតែក្រីក្រ​ដោយ​សារការ​ប្រកប​របរក​សិកម្មរបស់ខ្លួន។

បណ្ឌិតកសិកម្មរូបនេះបានផ្តល់ដោះស្រាយថា កសិករត្រូវខ្លួនឯងត្រូវចាប់ផ្តើមគិតពីទីផ្សារ មុននឹងផលិតកសិផលណាមួយត្រូវស្វែងយល់ពីទីផ្សារសិន ត្រូវសិក្សាទីផ្សារ ព្រោះ​យើង​លែង​ផលិត​សម្រាប់​ផ្គត់​ផ្គង់តែខ្លួនឯង គឺផលិតសម្រាប់ផ្គត់ផ្គង់លើទីផ្សារ ប្រែពីកសិករ ទៅជាកសិ-ពាណិជ្ជករ។

ត្រូវសិក្សាទីផ្សារមូលដ្ឋានឲ្យបានច្បាស់លាស់ និងសិក្សានរណាខ្លះជាផ្គត់ផ្គង់មកទីផ្សារនិងដែរ ដើម្បី​ងាយ​ស្រួលសហការគ្នា ចៀសវាងមានការប្រកួតប្រជែងគ្នាឯង។ ជាពិសេស​ត្រូវចេះ​ផ្តោត​សំខាន់​លើអ្វី ដែលខ្លួនត្រូវផលិតច្បាស់លាស់ និងពិតប្រាកដ សម្រាប់​បំពេញ​តម្រូវ​បរិមាណ​ណាមួយ​នោះ​លើទីផ្សារ​ឲ្យទៀងទាត់៕