តំបន់​ទេសចរណ៍​កំពង់​ភ្លុក​បង្ហាញ​សម្រស់​​ទាកទាញ​ភ្ញៀវទេសចរ​ជាតិ​-អន្ដរជាតិ

0
907

សៀមរាប៖ ក្រៅពី​ប្រាសាទបុរាណ​នានា​នៅក្នុង​ខេត្តសៀមរាប​នោះ  តំបន់​ទេសចរណ៍​កំពង់​ភ្លុក​ក៏​ជា​គោលដៅ​ទេស​ចរណ៍ធម្មជាតិ ដ៏​ទាក់ទាញ​មួយ​នៅក្នុង​រដូវ​ស្សា​នេះ​នៅក្នុង​ខេត្ត ដែល​នៅ​ទីនោះ​ភ្ញៀវទេសចរ​អាច​គយគន់​សម្រស់​​ពិត​នៃ​ធម្មជាតិ និង​ឈ្វេងយល់​ពី​ជីវភាព​រស់នៅ និង​ប្រពៃណី​ទំនៀមទម្លាប់​របស់​ប្រជាពលរដ្ឋ​នៅ​មូល​ដ្ឋាន។

លោក សាង គង់ ប្រធាន​សហគមន៍​ទេសចរណ៍ធម្មជាតិ​កំពង់​ភ្លុក​បានឱ្យដឹង​កាលពី​ថ្ងៃអាទិត្យ ៥កើត ខែអស្សុជ ឆ្នាំច សំរឹទ្ធិស័ក ពស ២៥៦២ ត្រូវ​នឹង​ថ្ងៃទី១៤ ខែតុលា ឆ្នាំ២០១៨ ថា សហគមន៍​ទេសចរណ៍​កំពង់​ភ្លុក ជា​គោល​ដៅ​ទេសចរណ៍ធម្មជាតិ​មួយ​ដ៏​សំខាន់ និង​កំពុង​ទាក់ទាញ​ភ្ញៀវទេសចរ​ជាតិ និង​អន្តរជាតិ ឱ្យទៅ​ដើរលេង​កម្សាន្ត​​នៅ​ទីនោះ ដែលមាន​ទេស ភាព​ព្រៃ​លិច​ទឹក ផ្ទះ​ប្រជាពលរដ្ឋ ដែល​ហ៊ុមព័ទ្ធ​ដោយ​ផ្ទៃ​ទឹក​ខៀវស្រងាត់​នៅ​ជុំវិញ​​នៅក្នុង​បឹង​ទន្លេសាប​ដ៏​ស្រស់ស្អាត​នា​រដូវវស្សា​នេះ។ ប្រជាពលរដ្ឋ​រស់នៅ​មូលដ្ឋាន​នេះ​មួយចំនួនធំ​កំពុង​មាន​​ការងារ​ធ្វើ​និង​ប្រកបមុខរបរ​រកស៊ី​ទ​ទួលបាន​ប្រាក់កម្រៃ​សមរម្យ​ពី​វិស័យ​ទេសចរណ៍។

លោក​បាន​បញ្ជាក់ថា ភ្ញៀវទេសចរ​ពេលធ្វើ​ដំណើរ​ទៅដល់​ភូមិឋាន​ដ៏​ស្រស់ស្អាត​មួយ​នេះ ភ្ញៀវទេសចរ​អាច​ជិះទូក​តូច​ទស្សនា​នៅក្រោម​ម្លប់​ព្រៃឈើ​លិច​ទឹក​ដ៏​ត្រជាក់ ក្រៅពីនេះ​នៅពេល​ល្ងាច​អាច​ទស្សនា​ថ្ងៃ​លិច​នៅលើ​ផ្ទៃ​ទឹក​ដ៏​ស្រស់ស្អាត នៅពេល​យប់​ភ្ញៀវទេសចរ​អាច ស្នាក់នៅ​ទីនោះ​បាន​ដោយ​សហគមន៍​មានផ្ទះ​ស្នាក់​រៀបចំ​យ៉ាង​ស្អាត​និង​មាន​ផាសុក​ភាពល្អ និង​ឈ្វេងយល់​ពី​ជីវភាព​រស់នៅ​និង​ប្រពៃណី​ទំនៀមទម្លាប់​របស់​ប្រជាពលរដ្ឋ​នៅ​មូលដ្ឋាន​នេះ​ផងដែរ។

លោក​បាន​បន្តថា ដោយសារ​ភាពស្រស់ស្អាត​នៃ​តំបន់​ទេសចរណ៍​កំពង់​ភ្លុក​នេះ​កាលពី​បុណ្យ​ភ្ជុំបិណ្ឌ​កន្លងទៅនេះ​មាន​ភ្ញៀវទេសចរ​ជាតិ និង​អន្តរជាតិ​ជាច្រើន​បានមក​កម្សាន្ត​នៅ​តំបន់​នេះ ដោយ​ពួកគេ​អាច​ទស្សនា​ទេសភាព​ដ៏​ស្រស់ស្អាត និង​អាច​លេង​ទឹក​សប្បាយ​ផង។

លោក ង៉ូ​វ សេង​កាក់ ប្រធាន​មន្ទីរ​ទេសចរណ៍​ខេត្តសៀមរាប​បានឱ្យដឹង​ថា កំពង់​ភ្លុក ជា​គោលដៅ​ទស្សនាចរណ៍​មួយ​ដែល​មិនគួរ​អាក់ខាន ព្រោះ​នៅ​ទីនោះ​ភ្ញៀវទេសចរ​អាច​ទស្សនា​ជាមួយ​ទស្សនីយភាពប្លែកៗនៃ​សម្រស់​ធម្ម​ជាតិ និង​ឈ្វេងយល់​ពី​ជីវភាព​រស់នៅ និង​ប្រពៃណី​ទំនៀមទម្លាប់ ក៏ដូចជា​ការប្រកបរ​បរ​នេសាទ​ជា​លក្ខណៈ​គ្រួសារ​​របស់​ប្រជាពលរដ្ឋ​យ៉ាង​ជក់ចិត្ត ។

លោក​ប្រធាន​មន្ទីរ​ទេសចរណ៍​ខេត្ត​បាន​បញ្ជាក់ថា កំពង់​ភ្លុក​ត្រូវបាន​ភ្ញៀវទេសចរ ជាពិសេស​ភ្ញៀវទេសចរ​បរទេស​ដែល​បាន​ទៅ​កម្សាន្ត​ទីនោះ មានការ​ពេញចិត្ត​ទៅ​និង​បរិ​យា កាស​ដ៏​ត្រជាក់​បរិសុទ្ធ នៅលើ​ផ្ទៃ​ទឹក​ដ៏​ថ្លាយង់ ឃើញ​មាន​សំណង់ផ្ទះ​បណ្តែត​ទឹក ព្រៃ​លិច​ទឹក​លាតសន្ធឹង​យ៉ាង​ឆ្ងាយ។

ដើម្បី​ដឹង​ច្បាស់​ថា តើ​សម្រស់​ធម្មជាតិ​កំពង់​ភ្លុក ការរស់នៅ​របស់​ប្រជាពលរដ្ឋ មាន​ទិដ្ឋភាព​ឆើតឆាយ​យ៉ាងណា​នោះ ភ្ញៀវទេសចរ​ជាតិ និង​អន្តរជាតិ​ដែល​បានមក​កម្សាន្ត​នៅ​ខេត្តសៀមរាប កុំ​ភ្លេច​ចូលទៅ​កម្សាន្ត​នៅ​តំបន់​ទេសចរណ៍ធម្មជាតិ​ដ៏​ស្រស់ស្អាត​មួយ​នេះ។

តំបន់​ទេសចរណ៍ធម្មជាតិ​កំពង់​ភ្លុក ស្ថិតនៅក្នុង​ឃុំ​កំពង់​ភ្លុក ស្រុក​ប្រាសាទបាគង ខេត្តសៀមរាប ដែលមាន​ចម្ងាយ​ពី​រួម​ខេត្តសៀមរាប​ប្រមាណ​ជាង ១០គីឡូម៉ែត្រ​ប៉ុណ្ណោះ ភ្ញៀវទេសចរ​ដែល​ចង់ទៅ​កម្សាន្ត​នៅ​ទីនោះ​គ្រាន់តែ​ចំណាយពេល​ប្រមាណ​ជា៣០នាទី ក្នុងការ​ធ្វើដំណើរ​ពី​ទី​រួម​ខេត្ត នឹង​ទៅដល់​កន្លែង​ដ៏​ស្រស់ស្អាត​នេះហើយ៕