ត្រឹម៣ខែ​ដើមឆ្នាំនេះ! កម្ពុជាបាននាំចេញជ័រកៅស៊ូជិត៤ម៉ឺនតោន ទៅទីផ្សារអន្តរជាតិ

0
1046

ភ្នំពេញ ៖ កម្ពុជាបាននាំចេញផលិតផលជ័រកៅស៊ូប្រមាណជាង ៤ម៉ឺនតោនហើយ ទៅកាន់​ទីផ្សារ​អន្តរជាតិ​ក្នុងរយៈ​ពេលត្រឹម៣ខែ ដើមឆ្នាំ២០១៨នេះ ខណៈទទួលបានចំណូលជាង ៥៧លានដុល្លារអាមេរិក កើន​ឡើង​តិចតួច​​បើធៀបនឹងរយៈពេលដូចគ្នាកាលពីឆ្នាំមុនក្នុងតម្លៃលក់ចេញជាង ១៤០០ដុល្លារក្នុង​១តោន។

លោក ប៉ុល សុផា អគ្គនាយក នៃអគ្គនាយកដ្ឋានកៅស៊ូ បានអះអាងថា ការកើនឡើងនេះ គឺដោយសារតែកម្ពុជា​បានពង្រីក​ផ្ទៃដីដាំកៅស៊ូក្នុងប្រទេសច្រើនជាងមុន ដើម្បីឆ្លើយតបទៅ នឹងតម្រូវ​ការទីផ្សារជ័រ​កៅស៊ូនៅ​ក្រៅ​ប្រទេស ដែលធ្វើឱ្យទិន្នផលផលិតរបស់យើងបានច្រើន។

លោកបានបញ្ជាក់ថា ទីផ្សារអន្តរជាតិនាំចេញសំខាន់ៗរបស់កម្ពុជា រួមមាន វៀតណាម ម៉ាឡេស៊ី សិង្ហបុរី និងប្រទេសចិន ដោយក្នុងនោះវៀតណាមជាទីផ្សារធំជាងគេរបស់កម្ពុជា។

បើតាមអគ្គនាយកដ្ឋានកៅស៊ូ បានឱ្យដឹងទៀតថា គិតមកដល់ពេលនេះ កម្ពុជាមាន ផ្ទៃដីកៅ ស៊ូសរុប​មានប្រមាណ​៤៣ម៉ឺនហិកតា ដែលក្នុងនោះផ្ទៃដីចៀរជ័រ មានចំនួនប្រមាណ ១៧ម៉ឺនហិកតាស្មើនឹង៣៩ភាគរយ និងផ្ទៃដីថែទាំកៅស៊ូមានជាង២៦ម៉ឺនហិកតា ជិត៦១ភាគរយ។

កាលពីពេលថ្មីៗនេះ ក្រុមហ៊ុនចិនមួយ នៅក្នុងខេត្តសានស៊ី បានចុះហត្ថលេខា លើអនុស្សរណៈយោគយល់គ្នា ជាមួយរដ្ឋមន្ត្រីក្រសួងពាណិជ្ជកម្មកម្ពុជា ដើម្បីទិញកៅស៊ូពី កម្ពុជា លើកដំបូង នៅឆ្នាំ ២០១៨ ដែលមានចំនួន៣០០.០០០តោន។

គួរបញ្ជាក់ថា  ប្រទេស​កម្ពុ​ជាមាន​ផ្ទៃដី​ដាំ​កៅស៊ូ​សរុប​ចំនួន ៣៦ម៉ឺន​ហិកតា ដែល​អាច​ផលិត​ជ័រកៅស៊ូ​បាន​ត្រឹម​ជា ១០ម៉ឺន​តោន​ក្នុងមួយឆ្នាំៗ ។ តាម​គោលការណ៍ កម្ពុជា​គ្រោង​នឹង​ពង្រីក​ផ្ទៃដី​ដាំ​ដុះ​ដល់​ទៅ​ជាង ៤០ម៉ឺន​ហិកតា​នៅ​ឆ្នាំ២០២០ ។ ទីផ្សារសំខាន់ៗ ក្នុង​ការនាំ​ជ័រកៅស៊ូ​ចេញ​របស់​កម្ពុជា មាន ម៉ាឡេស៊ី សិង្ហ​បុរី ចិន និង​វៀតណាម។

ប្រទេស​កម្ពុជា​ធ្លាប់បាន​ដឹកនាំ​កិច្ចប្រជុំ​លើក​ទី១៩ នៃ​សមាគម​អ្នក​ផលិត​កៅស៊ូ​ធម្មជាតិ ដែល​រៀបចំឡើង​រយៈពេល៥ថ្ងៃ។ កិច្ចប្រជុំ​នេះ មាន​សមាជិក​សរុប​ទាំងអស់ ១១ប្រទេស​ចូលរួម។

ក្នុង​កិច្ចប្រជុំ​រយៈពេល៥ថ្ងៃ​ គឺ​ចាប់ពី​ថ្ងៃទី១៩ ដល់២៣តុលា​នេះ បានសម្រេច​នូវ​លទ្ធផល​មួយចំនួន​រួម ការងារ​គ្រប់គ្រង​ផ្ទៃដី​ដាំ​កៅស៊ូ ដើម្បី​ងាយស្រួល​ប៉ាន់ស្មាន ចំពោះ​បរិមាណ​ផ្គត់ផ្គង់​ទៅតាម​ទីផ្សារ ជាមួយនឹង​តម្រូវ​ឲ្យ​ស្មើគ្នា។

មួយទៀត គឺ​ការកំណត់​គោលនយោបាយ ការពង្រឹង​ការប្រើប្រាស់​កៅស៊ូ​ក្នុងស្រុក មានន័យថា ក្រៅពី​ការនាំចេញ បណ្តា​ប្រទេស​ជា​សមាជិក​នៃ​សមាគម​អ្នក​ផលិត​កៅស៊ូ​ធម្មជាតិ ត្រូវ​រិះរក​វិធីសាស្ត្រ ដើម្បី​ផលិត​ជា​ឧស្សាហកម្ម​ក្នុងស្រុក​ផង។ ចំណុច​មួយទៀត គឺ​ការគិតគូរ​ពី​និរន្តរភាព​របស់​កៅស៊ូ។ល៕