យុវត្តីវ័យ២០ឆ្នាំបញ្ចប់បរិញ្ញាបត្ររងចាប់អាជីវកម្មបណ្តុះសណ្តែករកចំណូលជិត៨ពាន់ដុល្លារក្នុង១ខែ

0
1132

វិស័យកសិកម្មនៅកម្ពុជាគឺបានដើរតួយ៉ាងសំខាន់ក្នុងការអភិវឌ្ឍសេដ្ឋកិច្ចរបស់ប្រទេសដូច្នេះហើយទើបយុវត្តីវ័យ២០ឆ្នាំ គឺ ក​ញ្ញា គង់ សុស្រីពៅ បានចាប់ផ្តើមចាប់របរនេះ ក្រោយពីបញ្ចប់ការសិក្សារថ្នាក់បរិញ្ញាបត្ររងនៅសាលា​បច្ចេក​ទេសមួយ​នៅខេ​ត្ត​​ព្រះ​សីហនុ ខណៈមិត្តភក្តិរបស់នាងសង្វាតស្វែងរកការងារធ្វើនៅក្រុមហ៊ុនផ្សេងៗ។

នៅក្នុងកិច្ចសម្ភាសន៍ជាមួយ Business Cambodia នាងបានប្រាប់ថា ហេតុផលដែលនាងស​ម្រេចចិត្តចាប់អាជីវ​កម្មបណ្ដុះ​ស​ណ្ដែ​ក នេះឡើង គឺដោយសារតែការស្រឡាញ់ និងចង់លើកស្ទួយផលិផលរបស់ខ្មែរ ជាពិសេស​របរនេះ​នឹងអា​ចធ្វើឲ្យ​ជីវ​ភា​ព​គ្រួ​សាររបស់នាងផ្លាស់ប្តូរផងដែរ។

នាងបានបន្តថា ក្នុងមួយថ្ងៃនាងអាចរកចំណូលចូល​គ្រួសារប្រមាណពី២៥០ដុល្លារអាមេរិក ពីការលក់ចេញ​សណ្តែក ប្រមា​ណ​​ជា​៤០០គីឡូក្រាម។ ដោយឡែកចំពោះថ្ងៃបុណ្យវិញបរិមាណនៃតម្រូវការកើនឡើងរហូតទៅដល់ ៦០០​ទៅ៧០០​គីឡូ​ក្រា​ម ដែលអាចទទួលបានប្រាក់ចំណូលប្រមាណជាង ៤០០ដុល្លារ ក្នុងមួយថ្ងៃ។

សុស្រីពៅ ផ្តោតសំខាន់ទៅលើអ្នកលក់នៅតាមភោជនីយដ្ឋាននានានៅទូទាំងក្រុងកំពង់សោម​ ព្រមទាំងអ្នក​លក់​នៅទីផ្សារ​ផ​ង​ដែរ ដែលលក់នៅក្នុងតម្លៃត្រឹមតែ ២៥០០រៀលប៉ុណ្ណោះក្នុងមួយគីឡូក្រាម ដែលនេះជាតម្លៃមួយដែលសមរ​ម្យសម្រា​ប់​ឈ្មួ​ញ​កណ្តាលក្នុងការលក់ចេញបន្ត។

នាងមិនបានបណ្តុះសណ្តែកនៅលើដីនោះទេ ប៉ុន្តែនាងបានបណ្តុះវានៅក្នុងកូនពាងតូចៗ ប្រមាណជាង២០០ពាង ដែល​ប្រើ​ប្រាស់​គ្រាប់ចំនួន៨០គីឡូក្រាម ដែលនេះជាយុទ្ធសាស្រ្តមួយផ្តល់ភាព ងាយស្រួលសម្រាប់ការប្រមូលផល ព្រមទាំង​ទទួល​បា​ន​ទិន្នផលខ្ពស់ទៀតផង។

នាងបានសង្កត់ធ្ងន់ថា នៅក្នុងមុខរបររកស៊ី តែងមានការប្រកួតប្រជែងទីផ្សារ ក្នុងការដណ្តើមអតិថិជនប៉ុន្តែសម្រាប់នាង បែរ​ជា​គិតថា វាមិនសំខាន់នោះទេ ព្រោះ អតិជនរបស់គាត់ ជឿជាក់លើផលិផលរបស់នាង ទាំងទៅលើគុណភាព និងតម្លៃ ដោយ​នា​ងមិនដែលតម្លើងថ្លៃ ឬចុះថោក​តាមដៃគូរប្រកួតប្រជែង​ឡើយ។

ស្រីពៅ គឺជាបុគ្គលម្នាក់ដែលតែងចែករំលែកនូវចំណេះដឹងដែលនាងមាន ទៅគ្រប់គ្នាដែលចង់​ចេះ ចង់​ដឹងពីចំណេះជំ​នាញ​មួយ​នេះ ដោយមិនបានលាក់បាំងអ្វីឡើយ ពោលគឺនាង ចង់ឲ្យប្រជាពលរដ្ឋកម្ពុជា​ទាំង​អស់ក្លាយ​ជាមហាសេដ្ឋីកសិ​កម្មគ្រប់​គ្នា​។

ជាចុងក្រោយ សុស្រីពៅ បានផ្តែផ្តាំទៅកាន់ប្រជាពលរដ្ឋខ្មែរទាំងមូល ជាពិសេសយុវវ័យទាំងអស់ ត្រូវធ្វើអ្វីទៅ​តាម​សេចក្តី​ស្រ​ឡាញ់ និងភាពជឿជាក់របស់ខ្លួន ចុងក្រោយប្រាកដជាជោគជ័យ៕