ក្រសួង​វប្បធម៌ និង​វិចិត្រសិល្ប​: សហការ​ជាមួយ​មន្ត្រី មន្ទីរ​វប្បធម៌​ខេត្ត​ ​បើកដំណើរជួសជុលស្ពាន​បុរាណ​មួយកន្លែង នៅ​ដំណាក់កាល​ទី​៤ ក្នុង​ខេត្ត​ឧ​ត្ត​រ​មានជ័យ​

0
1327

ឧ​ត្ត​រ​មានជ័យ​ ៖ នាយកដ្ឋាន​គាំពារ​និង​អភិរក្ស​សំណង់​បុរាណ នៃ​ក្រសួង​វប្បធម៌ និង​វិចិត្រសិល្ប​: សហការ​ជាមួយ​មន្ត្រី មន្ទីរ​វប្បធម៌​ខេត្ត​ឧ​ត្ត​រ​មានជ័យ នៅ​ព្រឹក​ថ្ងៃទី​៨ ឧសភា ២០១៨ នេះ បានចាប់ផ្តើម​ជួសជុល ស្ពាន​បុរាណ​មួយកន្លែង នៅ​ដំណាក់កាល​ទី​៤ បន្ត ស្ថិតនៅ​ភូមិ​ជើងទៀន ឃុំ​ជើងទៀន ស្រុក​ចុងកាល់ ខេត្ត​ឧ​ត្ត​រ​មានជ័យ​។​

​លោក ហុង យឿន ប្រធាន​មន្ទីរ​វប្បធម៌ និង​វិចិត្រសិល្ប​: ខេត្ត​ឧ​ត្ត​រ​មានជ័យ បាន​ឲ្យ​ដឹងថា ស្ពាន​បុរាណ ដែល​ត្រូវ​ជួសជុល​នោះ មាន​ឈ្មោះថា ស្ពាន​ទ័ព ឬ​អ្នកស្រុក​ខ្លះ ហៅថា ស្ពាន​អូរ​ជីក​។ ស្ពាន​នេះ បាន​កសាងឡើង នៅក្នុង​ចន្លោះ​ចុង​សតវត្សរ៍​ទី​១២ ដើម​សតវត្សរ៍​ទី​១៣ នា​សម័យអង្គរ​។ ស្ពាន​នេះ មាន​បណ្តោយ​ប្រវែង ១៥១ ម៉ែត្រ​, ទទឹង​ប្រវែង ១៦,៨០ ម៉ែត្រ និង​មាន​កម្ពស់ គិតពី​បាត​ក្រោម ប្រវែង ១០ ម៉ែត្រ​។​

​លោក​ប្រធាន​មន្ទីរ​វប្បធម៌​ខេត្ត បានឱ្យដឹង​បន្តទៀតថា គោលបំណង​សំខាន់ នៃ​ការជួសជុល​ស្ពាន​បុរាណ​នេះ គឺ​ដោយសារតែ​តួ​ស្ពាន​ទាំងមូល មាន​សភាព​ចាស់​ទ្រុឌទ្រោម​។ លើសពីនេះទៅទៀត គឺ​ដើម្បី​អភិរក្ស​សំណង់​បុរាណ ឲ្យ​បាន​គង់វង្ស និង​សម្រាប់​បម្រើ ឲ្យ​វិស័យ​ទេសចរណ៍ ផ្ទុយទៅវិញ គឺ​មិនមែន​ជួសជុល ដើម្បី​សម្រាប់​ធ្វើដំណើរ ឆ្លងកាត់​ទៅមក​នោះទេ​។ ហើយ​នៅ​ខេត្ត​ឧ​ត្ត​រ​មានជ័យ និង​ត្រូវ​ធ្វើការ​ជុស​ជុល​ឡើងវិញ​ដែរ ដូចជា ប្រាសាទចាន ស្ថិតនៅ​ស្រុក​បន្ទាយ​អំពិល និង​ប្រាសាទ​មួយចំនួនទៀត នៅក្នុង​ខេត្ត​នេះ​។​

​លោកស្រី ជាម ផល្លី មន្ត្រី​បច្ចេកទេស នៃ​នាយកដ្ឋាន​គាំពារ និង​អភិរក្ស​សំណង់​បុរាណ នៃ​ក្រសួង​វប្បធម៌ និង​វិចិត្រសិល្ប​: និង​ជា​ប្រធាន​ការដ្ឋាន ជួសជុល​ស្ពាន​បុរាណ​នោះ បាន​ឲ្យ​ដឹងថា ការជួលជុល​ស្ពាន​បុរាណ នៅ​ខេត្ត​ឧ​ត្ត​រ​មានជ័យ​នេះ គឺ​ត្រូវ​ចំណាយ រយ​:​ពេល ៦ ខែ​។​

​លោកស្រី បាន​បន្តថា ស្ពាន​ទ័ព​នេះ ក្រសួង​វប្បធម៌ និង​វិ​ចិត្ត​សិល្បៈ បានចាប់ផ្តើម​អភិរក្ស និង​ជុស​ជុល​មាន បី ដំណាក់កាល​មកហើយ ដោយ​ដំណាក់កាល​ទី​១ នៅ​ឆ្នាំ​២០១៥ បាន​ជុស​ជុល​តួ​ស្ពាន នៅ​ផ្នែក​ខាងលិច ដំណាក់កាល​ទី​ពី និង​ទី​បី នៅក្នុង​ឆ្នាំ​២០១៦ ជុស​ជុល នៅ​ផ្នែក​ខាងកើត រួម​សសរស្ពាន និង​រៀបចំ​តួខ្លួន​នាគ ដាក់តាំង​លើ​ស្ពាន​ផងដែរ​។ ហើយ​នៅ​ដំណាក់កាល​ទី​៤ នេះ លោកស្រី បញ្ជាក់ថា នឹងធ្វើ​ការជួសជុល កន្លែង​ទ្រុឌទ្រោម​ដទៃទៀត នៃ​ស្ពាន​នេះ ហើយ​ការ​ជុស​ជុល​បន្ត​នេះ គឺ​ត្រូវ​ប្រើប្រាស់ កញ្ចប់​ថវិកា របស់​ជាតិ​ដែរ​។​

​លោក ហុង យឿន ក៍បាន​ឲ្យ​ដឹងផង​ដែរ​ថា ខេត្ត​ឧ​ត្ត​រ​មានជ័យ មាន​ស្ថានីយ​បុរាណ សរុប​ចំនួន ២៦៧ កន្លែង។ ស្ថា​នី​បុរាណ​ទាំងនោះ មានដូចជា ទួលប្រាសាទ​, ទួល​បុរាណ​, គោក ឬ​ភូមិ​បុរាណ​, ស្ថានីយ​យក​ថ្ម ព្រមទាំង​ស្រះ​បុរាណ។ គិត​មកដល់​ឆ្នាំ​២០១៨ នេះ សំណង់​បុរាណ​ទាំងនោះ គឺ​បានដាក់​បញ្ចូល ជា​សម្បត្តិ​បេតិកភណ្ឌ​ជាតិ នៅ​ក្រសួង​វប្បធម៌ និង​វិចិត្រសិល្ប​: រួចរាល់​អស់ហើយ៕​