អាហារ​លើ​មេឃលើកដំបូង​ក្នុងប្រទេស​ថៃ​ចាប់ផ្តើម​បើក​ហើយ

0
2171

​ប្រទេសថៃ៖ ភោជនីយដ្ឋាន Dinner In The Sky Thailand ចាប់ផ្តើម​បើក​ជា​ផ្លូវការ​ក្នុង​ទីក្រុង​បាងកក​កាលពី​ថ្ងៃ​សៅរ៍​ទី​៦​មករា​។ នេះ​គឺជា​លើកទីមួយ​ហើយ​ដែល​ភោជនីយដ្ឋាន​អាហារ​លើ​អាកាស​ដ៏​ល្បី​លើ​សកលលោក​នេះ​ត្រូវបាន​ផ្តល់ជូន​អតិថិជន​ថៃ​និង​ភ្ញៀវ​អន្តរជាតិ​ដែល​មក​ទស្សនា​ប្រទេស​ថៃ​។ ដោយមាន​តែ​តុ​អាហារ​ពេល​ល្ងាច​មួយ​ព្យួរ​ពីលើ​អាកាស​របស់​ពិភពលោក ភ្ញៀវ​ត្រូវបាន​ដាក់ឱ្យ​អង្គុយ​លើ​កៅអី​យ៉ាង​មាន​សុវត្ថិភាព​នៅ​កម្ពស់ ៥០ ម៉ែត្រ កន្លែង​ដែល​ពួកគេ​រីករាយ​ជាមួយនឹង​អាហារ​ពេល​ល្ងាច ៤ មុខ អម​ជាមួយ​ទេសភាព​ដ៏​អស្ចារ្យ​នៃ​ទីក្រុង​បាងកក​។​

​Dinner In The Sky Thailand នេះ​មាន​ទីតាំង​ស្ថិតនៅ​ចន្លោះ​ផ្សារ​ទំនើប The Emporium Shopping Complex សួនច្បារ​បិ​ន​ចា​សិរី និង សួន​ដាយ​ណូ​ស័​រ​។ កម្មវិធី​បើកសម្ពោធ​នេះ​រួមមាន​ទាំង​ពិធី​ជប់​លឿង​ដ៏​ធំ​សម្បើម ចូលរួម​ដោយ​ភ្ញៀវ VIP និង​អ្នកសារព័ត៌មាន តារា​ល្បីល្បាញ​រួមទាំង​រដ្ឋមន្ត្រី​ក្រសួងទេសចរណ៍​និង​កីឡា​លោក វីរៈ​សាក់ កៅស៊ូ​រ៉ាត់ នាយក​គ្រប់គ្រង​ភោជនីយដ្ឋាន លោកស្រី ភ្លឺ​ន​ភី​ត មឿ​ន​ផន និង​អាជ្ញាធរ​ទេសចរណ៍​ថៃ លោក វូដ​ឌី រួមទាំង​មិត្តភក្តិ​របស់គាត់​។​

​ដោយ​បើក​ប្រតិ​ប​ត្ដិ​ការ​នៅក្នុង​បណ្តា​ប្រទេស​ប្រមាណ ៤៥ ដែល​រួមមាន​បារាំង អាមេរិក ហូ​ឡង់ ចិន ម៉ា​កាវ ដា​ណឺ​ម៉ាក ហ្វាំ​ង​ឡង់ ជប៉ុន តៃវ៉ាន់ ព័រ​ទុយ​ហ្គា​ល់ ម៉ាឡេស៊ី និង​ស៊ុយអែត ភោជនីយដ្ឋាន Dinner In The Sky Thailand បាន​ចាប់​ដៃគូ​សហការ​ជាមួយ​ក្រុមហ៊ុន DITS ASIA ក្រុម Emporium Group ក្រុមហ៊ុន Sheraton Grande Sukhumvit និង ក្រុមហ៊ុន Uber Thailand៕

ប្រភព ​: រស្មីកម្ពុជា