ក្រសួង​សាធារណការ​គ្រោងចំណាយ​ថវិកាជាង​៧៥លានដុល្លារ សម្រាប់​កែ​លម្អ​ផ្លូវ​ជាតិ​លេខ​៤៨

0
1856

ក្រសួង​សាធារណការ​គ្រោងចំណាយ​ថវិការ​ជាង​៧៥លានដុល្លារសម្រាប់​ការ​កែ​ល្អលម្អ​ផ្លូវ​លេខ​៤៨ក្នុង​ខេត្ត​កោះ​កុង សំដៅ​រក្សា​គុណភាព​យូរ​អង្វែង​ដល់អ្នក​ប្រើ​ប្រាស់​។

យោង​តាម​ហ្វេស​បុក​របស់​ក្រសួង​សាធារណ​ការ និង​ដឹក​ជញ្ជូនកាល​ពីម្សិល​មិញ ក្នុងឱកាស​ចុះពិនិត្យ​ស្ថានភាព​ផ្លូវ​​ដែល​រង​ការខូចខាតដោយជំនន់ទឹកភ្លៀងស្ថិតក្នុងខេត្តកំពង់ស្ពឺ កោះកុង និង ខេត្តព្រះសីហនុ លោក​រដ្ឋមន្ត្រីស៊ុន ចាន់ថុល បាន​លើក​ឡើង​ថា នៅពេល​នេះ​ក្រសួងកំពុងរៀបចំនីតិវិធី​ជ្រើសរើស​ក្រុមហ៊ុនបច្ចេកទេស ដើម្បីរៀបចំដាក់​ឱ្យដេញ​ថ្លៃគម្រោង​ជួស​ជុល​ផ្លូវ​ជាតិ​លេខ​៤៨ ក្នុង​ខេត្តកោះ​កុង​ដែល​មាន​តម្លៃ​ជាង៧៥​លាន​ដុល្លារអាមរិក ។

លោក​បាន​ឲ្យ​ដឹងផងដែរ​ថា ថវិការ​ទាំង​នោះ​គឺ​បាន​មកពី​កម្ចីពី​​សាធារណរដ្ឋកូរ៉េ​ប្រមាណ៦៧​លានដុល្លារ និងថវិកាបដិភាគ​របស់​រាជរដ្ឋាភិ​បាល​ប្រមាណ ៨លានដុល្លារ​។

លោក​ក៏​បានសុំ​ការ​អធ្យា​ស្រ័យ​ពី​​ប្រជា​ពល​រដ្ឋ​នៅ​ទូ​ទាំង​ប្រទេស​ផង​ដែរ ចំពោះការលំបាកក្នុងការធ្វើ​ដំណើរ និងបាន​បញ្ជាក់​ថា ​ក្រសួងបានដឹងទាំងអស់អំពី ស្ថានភាពខូចខាតផ្លូវក្នុងរដូវភ្លៀងឆ្នាំនេះ តែ​ត្រូវរង់​ចាំតែ​រដូវភ្លៀ​ង​កន្លង​ផុត​សិន​​ ទើបក្រសួង​នឹងចាប់ផ្តើមចាត់វិធានការ ជួសជុលឡើងវិញបាន​។

យោងតាមរបាយការណ៍របស់នាយកដ្ឋានផ្លូវថ្នល់ គិតមកត្រឹមថ្ងៃទី២២ ខែសីហា ឆ្នាំ ២០១៨ ទំហំ​នៃការ​ខូច​ខាត​ផ្លូវជាតិលេខ៤៨ពីស្រុកស្រែអំបិលទៅខេត្តកោះកុងមានប្រវែងសរុប ៣៥,៥៤ គ.ម លើប្រវែងសរុប១៥៩,៦០គ.ម ស្មើនឹង២២,២៦% ដែលក្នុងនោះរាប់បញ្ចូលទាំងកំណាត់ផ្លូវដែលបានធ្វើការជួសជុលកាលពីឆ្នាំ២០១៧ផងដែរ៕