ការចិញ្ចឹម​ត្រី​សមុទ្រ កំពុង​កាក់កប សម្រាប់​អ្នក​សហគមន៍ ត្រពាំងរ​ពៅ ព្រែក​ក្រែង​ ខេត្តកំពត

0
2271

កំពត​ ៖ អ្នក​សហគមន៍​នេសាទ ត្រពាំងរ​ពៅ​-​ព្រែក​ក្រែង ស្ថិតក្នុង​ឃុំ​ព្រែក​ត្នោត ស្រុក​ទឹកឈូ កាន់​តែមាន​ចំណាប់អារម្មណ៍ លើ​ការចិញ្ចឹម​ត្រី​សមុទ្រ ព្រោះ​ប្រាក់ចំណូល​ប្រចាំឆ្នាំ គាប់ប្រសើរ​។​

​កសិករ ឈ្មោះ រី​ម មី អាយុ ៥៨ ឆ្នាំ រស់នៅ​ភូមិ​ត្រពាំងរ​ពៅ ឃុំ​ព្រែក​ត្នោត ស្រុក​ទឹកឈូ ខេត្តកំពត បាន​រៀបរាប់ថា គាត់​ចាប់ផ្តើម​ចិញ្ចឹម​ត្រី​សមុទ្រ តាំងពី​ឆ្នាំ​២០១១ ប៉ុន្តែ​កាលនោះ គឺ​បង្កើតជា​បែរ នៅក្នុង​ព្រែក​ប៉ុណ្ណោះ​។ ក្រោយពី​មាន​សហគមន៍ គាត់​ក៏​ផ្លាស់​ទីតាំង មក​ក្នុង​សមុទ្រ ជាមួយ​បងប្អូន ជា​សមាជិក​សហគមន៍​វិញ ដោយ​ចែកវេន​យាម​ប្រចាំថ្ងៃ​។ ការចិញ្ចឹម​ក្នុង​សមុទ្រ​ត្រី​លូតលាស់​បាន ឆាប់រហ័ស និង​មានគុណ​ភាពល្អប្រសើរ​ជាង​។

​កសិករ​ដដែល បានបញ្ជាក់​ឱ្យដឹងថា សម្រាប់​គាត់ ចិញ្ចឹម​តែ​ពីរ​ប្រភេទ​ទេ គឺ​ត្រី​ស្ពង់ និង​ត្រី​តុកកែ ខណៈដែល​អ្នកខ្លះ គេ​មាន​រហូតដល់​ត្រីអាំង​កឺ​យ និង​ត្រី​ផ្ទក់​សមុទ្រ​ទៀត​។ ពូជ​ត្រី​ស្ពង់​ត្រូវ​ទិញ ពី​ខេត្ត​ព្រះសីហនុ ដោយ​តម្លៃ​មួយ​ក្បាល​ពី ១.០០០ រៀល ទៅ ១.២០០ រៀល ។ ឯ​កូន​ត្រី​តុកកែ គឺ​ប្រមូល​ទិញ​ពី​អ្នកនេសាទ ក្នុងភូមិ ចាប់​ពីមួយ​ក្បាល ២៥០ រៀល ទៅ ២.០០០ រៀល​។

​កសិករ រី​ម មី បាន​បន្តថា ពី​ពេល​ព្រលែង​កូន រហូត​រយៈ ៧ ខែ ឬ ៧ ខែ​កន្លះ ត្រី​កើន​ទម្ងន់​មួយ ក្បាល ពី ០,៧០ គីឡូក្រាម ទៅមួយ​គីឡូក្រាម ទើប​ចាប់ផ្តើម​ប្រមូល​ផល ព្រោះ​ពេញ​ខ្នាត នៃ​តម្រូវការ​ទីផ្សារ​។ តម្លៃប្រែប្រួល តាម​រដូវ​កាល គឺ​ត្រី​តុកកែ លក់​ឱ្យ​ឈ្មួញ ក្នុង​មួយ​គីឡូក្រាម ពី ១១ ដុល្លារ ទៅ ១៣ ដុល្លារ​។ ចំណែក​ត្រី​ស្ពង់ មួយ​គីឡូក្រាម ពី ៥ ដុល្លារ ទៅ ៦ ដុល្លារ​។ អ្នក​ចិញ្ចឹម ត្រី​រូបនេះ បាន​បញ្ជាក់ថា គាត់​ធ្វើ​រួមគ្នា ពីរ​នាក់ មាន​ចំនួន​ប្រាំបួន​បែរ ដោយ​ក្នុង​មួយឆ្នាំ អាច​ទទួល ប្រាក់ចំណូល ប្រហែល ៥.០០០ ដុល្លារ​ដែរ បន្ទាប់ពី​ទូទាត់​ចំណាយ​រួចរាល់​។ ប៉ុន្តែ​ឆ្នាំ​ដំបូង អាច​សល់​បាន​ប្រហែល ២.០០០ ដុល្លារ ទៅ ៣.០០០ ដុល្លារ​ប៉ុណ្ណោះ ព្រោះ​ចំណាយ​លើ​ការទិញ ឧបករណ៍​ផ្សេងៗ​។​

​លោក ទិ​ត្យ រី​ន ប្រធាន​សហគមន៍​នេសាទ ត្រពាំងរ​ពៅ ព្រែក​ក្រែង បាន​ប្រាប់​ឱ្យដឹងថា ព្រោះតែ មើលឃើញ ពី​ប្រាក់ចំណូល​គួរសម ពេលនេះ សមាជិក​សហគមន៍ កាន់​តែមាន​ចំណាប់អារម្មណ៍ លើក​ការចិញ្ចឹម​ត្រី​សមុទ្រ គឺ​ប្រភេទ​ត្រី​តុកកែ ត្រី​ស្ពង់ ត្រី​ផ្ទក់​សមុទ្រ និង​ត្រីអាំង​កឺ​យ​។
​រហូតមកដល់​ពេលនេះ សមាជិក​សហគមន៍ ចំនួន ៣០ គ្រួសារ បានមក​ចិញ្ចឹម ជា​លក្ខណៈ ប្រមូលផ្តុំ នៅ​ដែន​សហគមន៍​ក្នុង​សមុទ្រ​។ ដោយឡែក ប្រមាណ​ប្រហែល ៥០ គ្រួសារ​ទៀត កំពុង​ចិញ្ចឹម​ជា​លក្ខណៈ​ឯកជន តាម​ដងព្រែក​។ តាម​ការកត់សម្គាល់ ឃើញថា មួយរយៈ​កន្លងមក ពួកគាត់​នេសាទ​បណ្តើរ ចិញ្ចឹម​ត្រី​បណ្តើរ ព្រោះ​ចិញ្ចឹម​ត្រី ដូច​ចិញ្ចឹម​ជ្រូក​ដែរ គឺ​ប្រាំ​មួយខែ ប្រមូល​ផល​ម្តង​។

​ប្រធាន​សហគមន៍ ក៏បាន​បញ្ជាក់​ផងដែរ​ថា សហគមន៍​ទទួល​ប្រយោជន៍ ពី​សមាជិក ពេល​ប្រមូល ផល គឺ​ពួកគាត់​បង់​បួន​ម៉ឺន​រៀល ក្នុង​មួយ​បែរ​។ ថវិកា​ទាំងនេះ សម្រាប់​ប្រើប្រាស់​ពេល​ចុះ​ល្បាត ទប់ស្កាត់ បទល្មើស​ក្នុង​ដែន​គ្រប់គ្រង ព្រោះ​សហគមន៍ មាន​កាតព្វកិច្ច អភិរក្ស​ព្រៃកោងកាង ធនធាន​សមុទ្រ​ផ្សេងៗ​ទៀត​។ លើសពីនោះ សហគមន៍ បាន​អភិរក្ស​តំបន់​គ្រែង​ឈាម ទំហំ ២ ហិកតា ដែល​មកដល់ពេលនេះ អ្នកនេសាទ ជា​លក្ខណៈ​គ្រួសារ បាននិងកំពុង​ទទួល​ផល រៀងរាល់ថ្ងៃ​។

​ពាក់ព័ន្ធ​នឹង​ការងារ​បន្ត លោក ទិ​ត្យ រី​ន បាន​រៀបរាប់ថា ក្រៅពី​ការផ្តល់​កន្លែង​ចិញ្ចឹម​ត្រី រួចហើយ គណៈកម្មការ នឹង​ព្យាយាម​រក​កន្លែង​ផ្សេង ដើម្បីឱ្យ​សមាជិក បាន​ទទួលផល ពី​ដែន​សហគមន៍ ដូចជា បង្កើត​តំបន់​អេកូ​ទេសចរណ៍ តា​រយៈ​ការដឹក​ភ្ញៀវ ដើរ​កម្សាន្ត តាម​ព្រៃកោងកាង ក៏ដូចជា តំបន់​អភិរក្ស​ផ្សេងៗ​ទៀត ពិសេស​ការបណ្តុះ​កូន​កោង​កាង សម្រាប់​លក់​ជូន​ភ្ញៀវ​។​

​លោក ស សូ​រិ​ន នាយ​ខណ្ឌ​រដ្ឋបាល​ជល​ផល នៃ​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកំពត បាន​មានប្រសាសន៍ថា នា​រយៈពេល​ប៉ុន្មាន​ឆ្នាំ ចុងក្រោយ​នេះ សហគមន៍​នេសាទ ត្រពាំងរ​ពៅ ព្រែក​ក្រែង មាន​សកម្មភាព​អភិវឌ្ឍន៍​ល្អប្រសើរ បន្ទាប់ពី​សហគមន៍​នេសាទ ត្រពាំង​សង្កែ និង​សហគមន៍​នេសាទ​កំពង់​សាមគ្គី​។ អ្វីដែល​កំពុង​ស្ថិតក្នុង​ភាព​មោទនៈ​នោះ គឹ​ការជំរុញ​ដល់ ប្រជាពលរដ្ឋ ចាប់យក​ឱកាស​ចិញ្ចឹម​ត្រី សមុទ្រ ក្រោយ​ទទួលបាន ការបណ្តុះបណ្តាល ពី​មន្ត្រី​ជំនាញ​ខណ្ឌ​រដ្ឋបាល​ជល​ផល សហការ​ជាមួយ​អង្គការ​ដៃគូ មួយចំនួន​។

​លោកនាយ​ខណ្ឌ បាន​បញ្ជាក់ថា ពីមួយ​ឆ្នាំទៅ​មួយឆ្នាំ ការកកើត​បែរ​ចិញ្ចឹម​ត្រី ទាំង​ក្នុង​សមុទ្រ ទាំង​នៅ​ដងព្រែក បាន​កើន​ឡើងជា​លំដាប់ ដោយ​មកដល់ពេលនេះ មាន​ប្រមាណ ៤០០ កន្លែង ខណៈដែល​ឆ្នាំ​២០១០ មាន​ប្រហែល ១០ បែរ​ប៉ុណ្ណោះ​។ ប៉ុន្តែ​ការចិញ្ចឹម​ត្រី ក្នុង​ព្រែក លក្ខខណ្ឌ​មិនសូវ​ប្រសើរ ដូច​ក្នុង​សមុទ្រ​ទេ ពិសេស​បញ្ហា​អនាម័យ បរិស្ថាន​ជាដើម​។

​លោក ស សូ​រិ​ន បាន​បញ្ជាក់ថា ក្នុងនាម​មន្ត្រី​ជំនាញ ពេលនេះ ខណ្ឌ​រដ្ឋបាល​ជលផល​កំពុង ព្យាយាម​ស្វែងរក​ដៃគូ ដើម្បី​គាំទ្រ​បន្ថែមទៀត ពិសេស​បញ្ហា​ថវិកា ព្រោះ​សហគមន៍​នេសាទ ត្រពាំងរ​ពៅ​-​ព្រែក​ក្រែង មាន​ឆន្ទៈ​ខ្ពស់ ក្នុងការ​ចូលរួម​បង្ក្រាប​បទល្មើស អភិរក្ស​ធ​ធាន​សមុទ្រ និង​ជួយ​លើកស្ទួយ​ជីវភាព ប្រជាពលរដ្ឋ​សហគមន៍ ក្នុង​មូលដ្ឋាន​៕